უკრაინის შინაგან საქმეთა სამინისტროს ინფორმაციით, კიევში დილის 06:00 საატისთვის, 25 ადამიანის დაღუპვაა დადასტურებული. 8 ადამიანი საავადმყოფოში გადაყვანის დროს, გზაში გარდაიცვალა, 4 საავადმყოფოში, 13 დაღუპული კი სამედიცინო ექსპერტიზაზე გადაიყვანეს.

უკრაინის ჯანდაცვის სამინისტროს მონაცემებით, 19 თებერვალს სამედიცინო პუნქტებს დახმარებისთვის 350-მდე ადამიანმა მიმართა, აქედან 240 უკვე გაწერილია. ცნობილია, რომ დაშავებულებს შორის 80-მდე სამართალდამცავი პირია, უმაღლესი რადას ოპოზიციონერი დეპუტატი ვასილი პაზინიაკი, 5 ჟურნალისტი და 3 არასრულწლოვანია.

შეგახსენებთ, რომ ევრომაიდანზე მომიტინგეებსა და „ბერკუტს“ შორის შეტაკებები გუშინ ღამით განახლდა და 13 საათს გრძელდებოდა. დემონსტრანტები ევრომაიდანის დაცვას განაგრძობენ. „ბერკუტი“ და შინაგანი ჯარები მომიტინგეების წინააღმდეგ ხმოვან ყუმბარებს, წყლის ჭავლს, რეზინის ტყვიებს და ჯავშანტექნიკასაც კი იყენებს. მიუხედავად ამისა, დემონსტრანტებმა მოახერხეს პოზიციების შენარჩუნება.