სოციალური ქსელის Facebook-ის ამერიკულ ვერსიაში მომხმარებლები შეძლებენ გენდერული იდენტობის 50 ვარიანტში მიუთითონ სქესი. ამგვარად, „მდედრობით“ და „მამრობით“ სქესებს დაემატება „ბიგენდერი“ (ადამიანი გარდამავალი, მოძრავი გენდერული იდენტობით, რომელსაც სქესობრივი თვითშეგნება განწყობის, თანამოსაუბრის, გარემოს მიხედვით ეცვლება), „ტრანსსექსუალი“, „ანდროგინი“ (ადამიანი, რომელსაც ორივე სქესის გარეგნული ნიშნები აქვს, ან ყველანაირ სქესობრივ ნიშანს მოკლებულია) და სხვა ოფციები.

Facebook-ში თვლიან, რომ ეს მომხმარებლებს მიცემს საშუალებას „თავი გამოხატონ რაც შეიძლება ზუსტად“.

„იქ ბევრი ადამიანი იქნება, ვისთვისაც ეს არაფერს ნიშნავს. თუმცა, იმ მცირერიცხოვანთათვის, ვისაც ეს ეხება, ეს ძალიან მნიშვნელოვანია, მათთვის ეს ყველაფერია“, - თქვა Facebook-ის ინჟინერმა ბრილე ჰარისონმა.

ეს ნაბიჯი მეტყველებს აშშ-ში ტრანსგენდერების უფლებებისათვის მოძრაობის მზარდ გავლენას, რომელიც ტრანსგენდერიბისათვის ისეთივე სამოქალაქო უფლებების მინიჭებას ითხოვს, როგორიც გეი-საზოგადოების წარმომადგენლებს გააჩნიათ.

გარდა ამისა, Facebook-ი თავის მილიარდზე მეტ მომხმარებელს საშუალებას მისცემს თავისი გენდერული იდენტობა არ გაამჟღავნოს და ეს ინფორმაცია მხოლოდ მათ გაუზიაროს, ვისაც თავად მოისურვებს.

2011 წელს, უილიამსის ამერიკული ინსტიტუტის მოხსენების თანახმად, აშშ-ის სრულწლოვანი მოსახლეობის დაახლოებით 0,3% (თითქმის 700 ათასი ადამიანი) ტრანსგენდერს წარმოადგენდა.

bbc.co.uk