აფხაზეთისა და ე.წ. სამხრეთ ოსეთის "საფეხბურთო ნაკრებები" World Football Cup-ზე მიიღებენ მონაწილეობას. ინფორმაციას პორტალი sportall.ambebi.ge ავრცელებს. წყაროს ცნობით, წლეულს არაოფიციალურ მუნდიალს შვედეთი უმასპინძლებს.

გაზეთ "ლელოს" ინფორმაციით, ტურნირს CONIFA ატარებს, რომელიც ფიფას არაწევრ "ეროვნულ ნაკრებთა" ორგანიზაციაა.

ჩემპიონატში სულ 12 გუნდი მონაწილეობს და მათ შორის არიან აფხაზეთისა და ე.წ. სამხრეთ ოსეთის "ნაკრებები".

ტურნირზე, რომელიც ივნისში გაიმართება, ასევე ითამაშებენ: არამეული სირია, ქურთისტანი, ტამილ ილამი, ზანზიბარი, დარფური, ელანი, კვებეკი, მთიანი ყარაბაღი, პადანია, საპმი და აკვიტანია.

ამასთან, როგორც "ლელო" წერს, ეს ტურნირი ფიფა-ს ეგიდით არ ტარდება და, ბუნებრივია, არც საქართველოს ფეხბურთის ფედერაციას შეუძლია ამ ნაკრებებს ტურნირში მონაწილეობაში ხელი შეუშალოს.