დაღესტანში გაანადგურეს დაჯგუფება „კადარის“ ლიდერი მირზაევი, რომელიც, წინასწარი მონაცემებით, ვოლგოგრადის ტერაქტებში თვითმკვლელების გაგზავნაზეა პასუხისმგებელი. ამის შესახებ, რესპუბლიკის სამართალდამცავ ორგანოებზე დაყრდნობით, სააგენტო „იტარ-ტასი“ იტყობინება.

ოპერაცია ოთხშაბათს დილით ქალაქ იზბერბაშში ჩატარდა. მებრძოლთა ჯგუფი ერთ-ერთ სახლში ბლოკში მოაქციეს. ერთ-ერთი მათგანი მოლაპარაკებების შემდეგ დანებდა, დანარჩენებმა ცეცხლი გახსნეს, რის შემდეგაც ისინი ჩაცხრილეს. დაჯგუფების მეთაური 30 წლის ჯამალდინ მირზაევი იყო. მირზაევთან ერთად სახლში კიდევ სამი მებრძოლი იყო. ერთ-ერთს ერქვა იუსუპ იახიაევი, ის მოკლულთა შორისაა.

შეგახსენებთ, რომ 2013 წლის 29 და 30 დეკემბერს, ვოლგოგრადში ორი ტერაქტი განხორციელდა. აფეთქებების შედეგად 34 ადამიანი დაიღუპა, 70-ზე მეტი კი დაიჭრა. აფეთქებებზე პასუხისმგებლობა თავის თავზე აიღეს ერაყულმა დაჯგუფება „ანსარ ალ-სუნამ“ და ჩრდილოკავკასიურმა დაჯგუფემა „ვილაიათ დაღესტანმა“.