საარჩევნო და პოლიტიკური ტექნოლოგიების კვლევითი ცენტრის დირექტორის კახი კახიშვილის ინფორმაციით ხელისუფლების ზოგიერთ ეშელონებში ექსპერტების დისკრედტიაციის გეგმა განიხილება.

ექსპერტის ვარაუდით, ხელისუფლება ამ საქმეში ჟურნალისტებსა და რამდენიმე დაქირავებულ ადამიანსაც გამოიყენებს.

ამის შესახებ კახიშვილი ,,ფეისბუქის“ საკუთარ გვერდზეე წერს.

„როგორც ჩემთვის გახდა ცნობილი და იმედია, რომ ინფორმაცია საბოლოოდ არ დადასტურდება, ხელისუფლების ზოგიერთ ეშელონში ( ამ ეტაპზე შეგნებულად არ ვაკონკრეტებ ) განიხილება გეგმა, რომელიც მიზნად ისახავს, დამოუკიდებელი სამოქალაქო სექტორის წარმომადგენლების ( ექსპერტების და ასე შემდეგ ) დისკრედიტაციას, რათა მათ სიტყვას საზოგადოებაში ფასი აღარ ჰქონდეს. ამ საქმეში ზოგიერთი ჟურნალისტისა და სპეციალურად დაქირავებული ადამიანების ჩართვასაც აპირებენ, რომლებიც სტატიებში " შავი " პიარის ტექნოლოგიებს გამოიყენებენ, ამასთან, სოციალურ ქსელში და ინტერნეტ სივრცეში გავრცელებული სტატიებისა და პუბლიკაციების ქვემოთ, დამოუკიდებელი ადამიანების " ნიკებით " ბინძურ კომენტარებს დაწერენ. პრინციპი იქნება მარტივი - დაგაბრალებ, რომ სპილო ხარ, შენ თავი იმართლე. გასაგებია, რომ ბოლომდე ვერ გაიმართლებ.

ამ სტატუსს ვდებ პრევენციის მიზნით, შემდეგ ზოგიერთებმა რომ არ განაცხადონ, არ ვიცოდითო და ასე შემდეგ.

იმედი მაქვს, რომ გადაწყვეტილების საბოლოო მიმღებში, საღი აზრი გაიმარჯვებს და მოკლევადიან ეფექტზე ორიენტირებული არ იქნება.

ძალიან მინდა, რომ ეს ინფორმაცია არ გამართლდეს, თუმცა რაღაც ნიშნები უკვე იკვეთება, იმედია ადგილი აქვს ჩვეულებრივ დამთხვევას,“- წერს კახიშვილი.