კიევის ცენტრში, გრუშევსკის ქუჩაზე მომიტინგეებსა და ბერკუტს შორის გვიან ღამით შეტაკებები განახლდა.

უკრაინული მე-5 არხის ცნობთ, ბერკუტმა ცეცხლი რეზინის ტყვიებით გახსნა. აქციის ერთი მონაწილე დაშავდა. აქტივისტებმა სპეცრაზმელებს პეტარდები და მოლოტოვის კოქტეილები ესროლეს. დემონსტრანტებმა კვლავ საბურავების კოცონები დაანთეს, რომელიც მათსა და ბერკუტს შორის ბარიერს ქმნის.

მომიტინგეების თქმით, ,,ბერკუტის სპეცრაზმელებმა თავად გახსნეს ცეცხლი აქტივისტების მისამართით, რაც იმას ნიშნავს, რომ დროებითი ზავი დასრულებულია“.

ცეცხლის შეწყვეტა ოპოზიციასა და სამართალდამცველებს შორის 23 იანვარს დილით გამოცხადდა. უკრაინის შინაგან საქმეთა სამინისტრომ 24 იანვარს განაცხადა, რომ ოპოზიციასა და ხელისუფლებას შორის მოლაპარაკებების პერიოდში დემონსტრანტების წინააღმდეგ არაფერს მოიმოქმედებდა.