კლიჩკო - მაშინებს ის, რომ შესაძლოა მსხვერპლი გაიზარდოს

მსოფლიო - 09:24, 24 Jan, 2014

2175

უკრაინის ხელისუფლებასთან გამართული უშედეგო მოლაპარაკებების შემდეგ ოპოზიციის ლიდერმა ვიტალი კლიჩკომ აქციის მონაწილეებს სიტყვით მიმართა.
"ახლახანს დავბრუნდით პრეზიდენტის რეზიდენციიდან და დღევანდელი შედეგები ალბათ ბევრს იმედს გაუცრუებს. ჩვენ მრავალი საკითხი წამოვწიეთ, რაზეც დიდი ხანია ვსაუბრობთ. იანუკოვიჩს გადადგომა არ სურს, არც მთავრობის გადაყენება უნდა. დღეს ვდგავარ ამ სცენაზე, რათა არ იყოს სისხლისღვრა და ხალხი არ დაიღუპოს. ვიცით, რომ დღეს 30-ზე მეტი ადამიანია დაკავებული. ახალგაზრდები, რომლებიც დაჭრილები არიან, საავადმყოფოებიდან გაჰყავთ და იზოლატორებში ათავსებენ. დღევანდელ მოლაპარაკებაზე მხოლოდ მცირედის მიღწევა მოვახერხეთ, ისინი მზად არიან დაკავებული აქტივისტები გაათავისუფლონ და შეწყვიტონ ზეწოლა. რამდენიმე საათიანი საუბრის შემდეგ ეს ერთადერთია, რაზეც ის დაგვთანხმდა. ეს საუბარი უშედეგო გამოდგა. რა თქმა უნდა, უაზროა მოლაპარაკების მაგიდასთან იმ ადამიანთან დაჯდომა, ვისაც წინასწარ სურს შენი მოტყუება. მე გუშინ გამოვაცხადე წინააღმდეგობა, რომლის ფარგლებშიც ხალხი არ უნდა შეეგუოს ამ მთავრობას. ისინი ჩვენ შეშინებას ცდილობენ. ამის მცდელობა ჰქონდათ მოლაპარაკებების დროსაც. ცდილობდნენ შევეშინებინეთ, რამდენს მოგვისჯიდნენ თითოეულს, თუმცა დანებებას არ ვაპირებთ. ერთადერთი, რაზეც ვდარდობ და რაც ძალიან მაშინებს, არის ის, რომ შესაძლოა მსხვერპლი გაიზარდოს. დიახ, მეშინია პასუხის გაცემა მშობლებისთვის, თუ რატომ დაიღუპნენ მათი შვილები. რომ არ ყოფილიყო მაიდანი, არ იქნებოდა თავისუფლება. დღეს რამდენიმე ქალაქია, ხვალ უფრო მეტი იქნება. გავაფართოვებთ მაიდნის ტერიტორიას სანამ ეს ხალხი პასუხს არ აგებს. ვრჩები მაიდანზე. შემდეგი ნაბიჯი უნდა იყოს მთელი უკრაინის გაერთიანება და საერთო დაუმორჩილებლობა. ჩვენ შეგვიძლია სისხლისღვრის გარეშე შევცვალოთ ხელისუფლება. ვიცი გამაკრიტიკებენ და უამრავი აზრი იქნება ამასთან დაკავშირებით, მაგრამ მზად ვარ შევწირო ჩემი სახელი და რეპუტაცია, დავთმო ყველაფერი, რათა ვიცხოვრო თავისუფალ ქვეყანაში თქვენთან ერთად“,- განაცხადა ვიტალი კლიჩკომ.