კიევში ძალისმიერი მოქმედებების უკან კრემლი დგას, ამის შესახებ უკრაინის უსაფრთხოების სამსახურის პრეს-სამსახურის ექს-მეთაურმა სტანისლავ რეჩინსკიმ განაცხადა.

„ვფიქრობ, რომ ახლა საუბარი უკვე სამოქალაქო ომზე კი არა, არამედ შემოჭრაზეა. რუსულ შემოჭრაზე“, - დაწერა რეჩინსკიმ საკუთარ გვერდზე სოციალურ ქსელში.

„უკვე არაერთმა წყარომ თქვა იმის შესახებ, რომ უკრაინის უსაფრთხოების სამსახურში „ფსბ“-ს სპეციალისტები სხედან, იმის შესახებ, რომ „ბერკუტის“ ფორმაში არიან რუსები, რომლებიც კლავენ. (მე არ ვამართლებ ჩვენ „ბერკუტს“, ისინი არანაკლები ნაძირლები არიან). ლუცენკოს გატაცებასა და ვერბიცკის დადასტურებულ მკვლელობას წყაროები ასევე უკავშირებენ რუსეთს. თუნდაც იმიტომ, რომ ყველაფერი მტკივნეულად სუფთად გააკეთეს. არცერთი კვალი. კლიშე, რომელიც ძალიანჰგავს რუსულს. ოღონდ ჯერჯერობით მინიატურული“, - განმარტავს რეჩინსკი.

„თუ უახლოეს დროში ჩვენთან აფეთქდება საცხოვრებელი სახლი ან მეტრო - გაიგეთ, ეს არ არის სამოქალაქო ომის დასაწყისი, ეს - შემოჭრაა. და ეს უნდა დავუმტკიცოთ მსოფლიოს“, - მიიჩნევს უსაფრთხოების სამსახურის ყოფილი მეთაური.