ტიმოშენკო აჯანყებისკენ მოუწოდებს - იანუკოვიჩი პრეზიდენტიდან მკვლელად იქცა

მსოფლიო - 19:21, 22 Jan, 2014

3332

პატიმრობაში მყოფმა ყოფილმა პრემიერმა იულია ტიმოშენკომ განცხადება გაავრცელა, სადაც უკრაინელებს აჯანყებისაკენ მოუწოდა.
"იანუკოვიჩმა გასცა ბრძანება ევრომაიდანელების წინააღმდეგ ცეცხლსასროლი იარაღის გამოყენების შესახებ. პირველი დაიღუპა სერგეი ნიგოიანი, რომელიც აქციების დაწყებიდანვე იყო ევრომაიდანზე, შემდეგ - უკრაინის კიდევ ორი შვილი. ამ გმირთა სისხლი იანუკოვიჩის ხელებზეა. იანუკოვიჩი პრეზიდენდიდან საკუთარი ხალხის მკვლელად იქცა. გთხოვთ წუთიერი დუმილით მიაგოთ პატივი მათ ხსოვნას," - ნათქვამია განცხადებაში, რომელიც მის ოფიციალურ ვებგვერდზეა განთავსებული.

ტიმოშენკოს თქმით, თუ უკრაინელი ხალხი ამ ფაქტს შეეგუება და პასუხს არ მოსთხოვს იანუკოვიჩს, ის სამუდამო მონობაში დარჩება, უკრაინელებს სხვა არჩევანი არ დარჩათ - ან თავისუფალი უკრაინა, ან დიქტატორული რეჟიმის უღლის ქვეშ ცხოვრება.

"მოვუწოდებ ყველა იმ ადამიანს, რომელიც სამხრეებიან ტანსაცმელს ატარებს, არ აიღოთ თქვენს თავზე უკრაინის შვილების სისხლის ცოდვა, არც სამსახური, არც ხელფასი, არც სამხრეები არ ღირს სულის სიკვდილად. დატოვეთიანუკოვიჩის დაქირავებულ მკვლელთა ბანდის რიგები და გადადით თქვენი ქვეყნის მხარეზე, თქვენი დედბიც ხომ ისევე ლოცულობენ ჩვენი ქვეყნისთვის," - მოუწოდებს ტიმოშენკო სპეცრაზმელებს.
ტიმოშენკო დასავლეთის ცივილიზებულ სამყაროსაც მიმართავს და სთხოვს სასწრაფოდ გახსნან ე.წ. "მეორე ფრონტი" უკრაინის ხელისუფლების წინააღმდეგ, წინააღმდეგ შემთხვევაში შესაძლოა უკრაინის ყველა მშვიდობიანი მოქალაქე შეეწიროს დიქტატორულ რეჟიმს.

"უკრაინელებო! ჩვენი წმინდა მიწის შვილები აღსდექით! ნუ მისცემთ თავისუფალი უკრაინის მოკვლის უფლებას! თქვენს გარეშე უკრაინა ვერ გაუძლებს!" - აცხადებს ტიმოშენკო თავისი მოწოდების დასარულს.