მატვეი განაპოლსკი: "იანუკოვიჩი უყურებს რუსეთს... უკრაინა რუსეთი არაა"

მსოფლიო - 18:45, 22 Jan, 2014

3184

გთავაზობთ ცნობილი რუსი ჟურნალისტის, მატვეი განაპოლსკის შეფასებებს უკრაინაში მიმდინარე ბოლოდროინდელ მოვლენებზე, რომელიც მან "რუსთავი 2"-ის ეთერში სატელეფონო ჩართვისას გააკეთა.

"მე კიევში ვიმყოფები. ცხადია, ახლა მთელი უკრაინის, რუსეთისა და, დარწმუნებული ვარ, საქართველოს ყურადღებაც კიევისკენაა მიპყრობილი.

ოპოზიციის მთავარი მოთხოვნა იანუკოვიჩის გადადგომაა, მაგრამ ფაქტია, რომ მიმდინარე შეხვედრაზე ამის შესახებ საუბარი არ იქნება. საუბარია მოთხოვნათა მეორე ტალღაზე, იმ დრაკონული კანონების გაუქმებაზე, რომელიც 16 იანვარს მიიღეს და რომელთა თანახმადაც ფაქტიურად, ქუჩაში ყველა პოლიტიკურ აქტიურობაზე შეიძლება 5-15 წლით ჩაჯდე ციხეში.

ანალოგიისათვის, თბილისში, რუსთაველზე, ფეხით 20 კაცით რომ გაიაროთ და რაღაც მოთხოვნები დააყენოთ, ამ კანონების თანახმად, ამას ანტისახელმწიფოებრივ ქმედებად ჩაგითვლიან და 15 წელს მოგისჯიან.

არსებობს მოთხოვნათა სხვა ტალღებიც, მაგრამ მე ერთი რამ მინდა ავღნიშნო: რადგან არ არებობს ერთიანი ოპოზიციური ლიდერი, არ არსებობს ერთიანი მოთხოვნებიც, შესძლებს კი მოთხოვნათა საბოლოო ფორმულირებას ოპოზიცია? ამას მიმდინარე მოლაპარაკებების შედეგი გვაჩვენებს.

თუ მოლაპარაკებები უშედეგოდ დასრულდა, ვითარება კვლავ იგივე დარჩება - მაიდანი დაიცავს თავს, ხოლო ხელისუფლება დაძრავს "ბერკუტს". ეს უკვე იყო, მაგრამ ამ სიტუაციიდან გამოსვლაა საჭირო, ეს ესმის ხელისუფლებასაც და ოპოზიციასაც.

ჩემი აზრით, ახლა საჭიროა ჩამოყალიბდეს ერთიანი მოთხოვნები, ხოლო იანუკოვიჩმა, როგორც ერის მამამ (შეიძლება მას ასეც ვუწოდოთ), უნდა გაითვალისწინოს ისინი და გადადგას შემხვედრი ნაბიჯები. ფაქტია - რადგან უკვე გაჩნდა მსხვერპლი, ასე გაგრძელება აღარ შეიძლება.

უკრაინა რუსეთი არაა და მას ევროპის გარეშე არსებობა არ შეუძლია. საუბარია სანქციებზე და თუ ეს სანქციები დაწესდა, იანუკოვიჩი მეზობელ პოლონეთშიც ვერ წავა. უკვე საუბარია გარკვეულ თანამდებობის პირთა ევროპაში შესვლის აკრძალვაზე, ჯერ გვარები არ სახელდება, მაგრამ ალბათ საუბარია იმათზე, ვინც დარბევების ორგანიზატიორია.

ამასთან, უკრაინა არაა რუსეთი და აქ ასეთი სისხლიანი დარბევებისა და ოპერაციების განხორციელება შეუძლებელია, რადგან ძალიან მწვავე იქნება დასავლეთის რეაქცია.

დასავლეთის კრიტიკა ისმის, მაგრამ ის ვერაფერს ცვლის. ეს ერთი. ამ პროცესებში რუსეთის გავლენა თუნდაც იმით ჩანს, რომ ეს ავადსახსენებელი კანონები რუსული კალკია. რუსეთმა პირდაპირ თუ არა ირიბად საშინელი როლი ითამაშა ამ პროცესებში. იანუკოვოჩი უყურებს რუსეთს, იმ მეთოდებს და ხერხებს იყენებს, რომელმაც რუსეთში კარგი შედეგები მისცა ხელისუფლებას. თუმცა, აღმოჩნდა, რომ უკრაინელი ხალხი სხვაა.

რუსეთში ხალხი დაიშლებოდა, აქ, როგორც ხედავთ, პირიქით - იმატებს. სიტუაცია ჩიხურია და საგანგაშო. თუმცა, ერთიც ცხადია - ეს ყველაფერი ხდება რაღაც 100 მეტრის რადიუსის ფართობზე. ამ წრის გაღმა მოძრაობენ მანქანები, მშვიდად დადიან ქუჩაში ადამიანები. მუშაობს რესტორნები. საქართველოსგან განსხვავებით, აქ საზოგადოების სხვადასხვა ფენა სხვადასხვა ზომით არის პოლიტიზირებული. პროვინცია ხომ საერთოდ მშვიდად ცხივრობს.

ასე რომ ვნახოთ."