ექსპერტი თორნიკე შარაშენიძე ჟენევის მოლაპარაკებების თანათავმჯდომარის ფილიპ ლეფორის განცხადებას ეხმაურება. შარაშენიძე აღნიშნულის შესახებ სოციალურ ქსელში წერს:

„ფილიპ ლეფორის განცხადებაზე ბევრი ყიყინი ატყდა, მაგრამ მოდით ერთი ცოტა საღი თვალით შევხედოთ ყველაფერს: დარწმუნებული ვარ ლეფორის განცხადება რეგნუმმა ცოტათი შეცვალა (აბა ისე რის რეგნუმია), მაგრამ ალბათ მხოლოდ ცოტათი. ეს კი იმას ნიშნავს, რომ ლეფორი ბოლომდე სერიოზულად არ გვიყურებს, რაც ჩვენი ჩინოვნიკების (როგორც ყოფილი, ასევე ახალი ხელისუფლების სამსახურში მყოფების) დამსახურება უნდა იყოს.

მაგრამ კიდევ უფრო დიდი პრობლემა ისაა (და ეს ლეფორს სცდება), რომ ჩვენს საზოგადოებას ბოლომდე ვერ გაუაზრებია ოსებთან და აფხაზებთან ურთიერთობა და ყველაფერს კრემლს აბრალებს. ეს გააზრება მანამდე არ მოხდება, სანამ ჩვენს ქვეყანაში მცხოვრებ ეთნიკურად ქართველს ყველაზე მაღლა დავაყენებთ, ეთნიკურად არაქართველებს კი მეორეხარისხოვნებად ჩავთვლით; სანამ ისტერიკებს ავტეხავთ მავან ეთნიკურ სომეხსა თუ ოსზე რომლებიც ქართულად გადაიკეთებენ გვარს - ეგენი ხომ მაინც სომხები და ოსები არიან და როგორ გაბედეს ქართველებად რომ ასაღებენ თავსო. სწორედ ამნაირმა დამოკიდებულებამ გააჩინა ოსებისა და აფხაზების პრობლემა, კრემლის როლი კი ამ ეტაპზე შეიძლება მართლაც გადამწყვეტია, მაგრამ 80-იანების ბოლოს (როცა ეს პრობლემა გაჩნდა) მეორეხარისხოვანი იყო. მცირერიცხოვანი ერი ვართ და უნდა გვიხაროდეს ვინმეს გაქართველება თუ უნდა. არც შერეული ქორწინებებია ცუდი - პირიქით ეგეთი რამეები გენებს ანახლებს და აჯანსაღებს.

ჩვენს ამ დამოკიდებულებას ალბათ ბევრი ხვდება და ამიტომაც არ გვიყურებს სერიოზულად. არ ვიცი ლეფორი ამას მიხვდა თუ არა და მართალი გითხრათ, ეგ არც მაინტერესებს, ეგ კაცი ისევ და ისევ მაინც ჩვენი ჩინოვნიკების პრობლემა მგონია“, - წერს შარაშენიძე.