„ENA უნდა გაუხმო ყველას, ვისაც ამ დაწესებულების დიპლომში ეჭვი ეპარება. ისე კი გაუხმათ მგონი :)))))))))))“ — ასეთი კომენტარი გაუკეთა იუსტიციის სამინისტროს პრეს-მდივანმა ქალბატონმა მარიამ სხილაძემ იუსტიციის მინისტრის ქალბატონ თეა წულუკიანის სტრასბურგში გადაღებულ ფოტოს, სადაც მინისტრი გადაღებულია ENA-ს (ნაციონალური დიპლომატიური სკოლის ფონზე, რომელიც ქალბატონ თეა წულუკიანს აქვს დამთავრებული და მისი დიპლომის არაიურიდიული სტატუსი რადენიმე ხნის წინათ საზოგადოების კრიტიკის ქვეშ მოექცა).

დღეს მინისტრი წულუკიანის 5 ფოტო საკუთარ ფეისბუქზე გამოაქვეყნა იუსტიციის სამინისტროს პრესმდივანმა ერთიანი ფამილარული სათაურით - „თეა The Best მეგობარი და მინისტრი“.

მინისტრი წულუკიანის სტრასბურგში გადაღებული ყველა ფოტო რეპორტაჟული ჟანრით აქვს დასათაურებული მის პრესმდივანმა. ქალბატონი მარიამ სხილაძე ექსკლუზიურ ფოტო-რეპორტაჟში იუწყება, რომ მინისტრს სტრასბურგში მანსარდიანი სახლი აქვს ნაყიდი მსხვილი კრედიტით და ამ კრედიტის გაქირავებული სახლის შემოსავლით ისტუმრებს.

როგორც ჩვენთვის ცნობილია, მინისტრი წულუკიანი და მისი მეგობარი-პრესმდივანი მარიამ სხილაძე საშობაო არდადეგებზე ერთად იმყოფებოდნენ იტალიასა და სტრასბურგში და ეს საიმიჯო ფოტო-რეპორტაჟიც სწორედ ამ ვოიაჟის დროს არის გადაღებული და „არადიპლომატიური წყევლის“ საბაბიც ENA-ს საკუთარი თვალით ნახვის შემდეგ გაუჩნდა ქალბატონ სხილაძეს.