ტესტი SpermCheck-ი, სპერმაში სპერმატოზოიდების ხარისხს ამოწმებს. მისი გამოყენებით, ნებისმიერ მსურველს შეუძლია შინ შეამოწმოს საკუთარი სპერმა და დაადგინოს ექნება თუ არა პრობლემა ჩასახვასთან დაკავშირებით. ამის შესახებ ბრიტანული გამოცემა The Daily Mail-ი იტყობინება.

ტესტის ღირებულება 30 ფუნტია. ექიმებმა უკვე გამოთქვეს აზრი, რომ ცოლები მეუღლეებს გაფრთხილების გარეშე შეუმოწმებენ სპერმის ხარისხს.

ტესტი შემდეგი პრინციპით მუშაობს: იძებნება ცილა SP-10, რომელსაც მხოლოდ მომწიფებული სპერმატოზოიდის თავი შეიცავს. შეგროვებული მასალის შემოწმება სპერმის აღებიდან 3 საათის განმავლობაშია შესაძლებელი. SpermCheck მხოლოდ 10 წუთში გიჩვენებთ ნორმაშია თუ არა სპერმატოზოიდების კონცენტრაციის დონე.

ტესტი 98%-იანი სიზუსტით ითვლის, შედის თუ არა დაახლოებით ერთ მილილიტრ ბიოლოგიურ ნივთიერებაში 20 მილიონი სპერმატოზოიდი. სტატისტიკის თანახმად ასეთი მაჩვენებელი 10-იდან 9 მამაკაცს აქვს. თუ სპერმატოზოიდების რაოდენობა 20 მლნ-ზე ნაკლებია, მამაკაცისთვის ჩასახვა უფრო რთულდება. მიუხედავად ოპერატიულობისა და სიზუსტისა, ტესტს არ შეუძლია იმის დადგენა, თუ რამდენად ჯანმრთელია თავად სპერმატოზოიდი.