14 წლის წინ მოკლული ოპოზიციონერი ჟურნალისტის გიორგი ღონღაძის დაკრძალვას წელს გეგმავენ.

„დიახ, დაკრძალვა იგეგმება. როდის მოხდება ეს და სად, დამატებით შეგატყობინებთ, როდესაც ყველა დეტალს დავალაგებთ“, - განაცხადა გარდაცვლილის მეუღლემ მიროსლავა ღონღაძემ. როგორც ცნობილია, ამ 14 წლის მანძილზე გიორგი ღონღაძის ნეშტი კიევის ერთ-ერთ მორგში ესვენა.

შეგახსენებთ, რომ ჟურნალისტი გიორგი ღონღაძე კიევში 2000 წლის 16 სექტემბერს დაიკარგა. იმავე წლის ნოემბერში, უკრაინის დედაქალაქთან ახლოს, ტყეში იპოვეს თავმოკვეთილი გვამი, რომელიც ექსპერტთა დასკვნით, ღონღაძეს ეკუთვნოდა.

ამის შემდეგ, გამოქვეყნდა სახელმწიფო დაცვის ექს-მაიორ ნიკოლაი მელნიჩენკოს მიერ, სავარაუდოდ, მაშინდელი პრეზიდენტის ლეონიდ კუჩმას კაბინეტში გაკეთებული ჩანაწერი. ჩანაწერში კუჩმას მსგავსი ხმა იძლევა განკარგულებას „მოუარონ“ ჟურნალისტს.

2013 წლის 29 იანვარს, კიევის პეჩერის რაიონის სასამართლომ ჟურნალისტ გიორგი ღონღაძის მკვლელობაში დამნაშავედ ცნო შსს-ს ექს-გენერალი ალექსეი პუკაჩი და სამუდამო პატიმრობა მიუსაჯა.

პუკაჩმა აღიარა, რომ თავისი ხელით გაგუდა ჟურნალისტი. ხოლო განაჩენის გამოტანის შემდეგ ფაქტობრივად აღიარა დანაშაულთან სახელმწიფოს უმაღლესი პირების კავშირი. მან განაცხადა, რომ მკვლელობის მოტივების შესახებ ლეონიდ კუჩმას და უმაღლესი რადას ექს-თავმჯდომარეს ვლადიმერ ლიტვინს უნდა კითხონ.

თავად კუჩმა ჟურნალისტის დაღუპვასთან კავშირს უარყოფს.

2011 წლის მარტში კუჩმას წინააღმდეგ ხელისუფლებისა და სამსახურებრივი უფლებამოსილების გადამეტების, რამაც შედეგად ღონღაძის მოკვლა გამოიწვია, ბრალდებით სისხლის სამართლის საქმე აღიძრა. თუმცა, იმავე წლის დეკემბერში, კიევის პეჩერის რაიონის სასამართლომ საქმის აღძვრა უკანონოდ ცნო. სასამართლომ მალნიჩენკოს ჩანაწერი ღონღაძის მკვლელობის საქმის მტკიცებულებად არ აღიარა.