ცენტრალური აფრიკის რესპუბლიკაში, ქალაქ ბანგიში ადგილობრივმა მცხოვრებმა, მამაკაცის, რომელიც მანამდე ადამიანთა ჯგუფმა მოკლა, ფეხი სახალხოდ შეჭამა. ამის შესახებ იტყობინება „ბი-ბი-სის“ კორესპონდენტი პოლ ვუდი, რომელიც მომხდარს შეესწრო.

ჟურნალისტმა კანიბალთან გასაუბრება შეძლო. მამაკაცმა თავი წარადგინა როგორც ოუნჯა მაგლიორი და კორესპონდენტს აუხსნა, რომ მოკლული მუსულმანი იყო, ხოლო ამ რელიგიის წარმომადგენლებმა ადრე მისი ფეხმძიმე მეუღლე, და და დისშვილი დახოცეს.

ვუდის კითხვაზე, თუ რატომ შეჭამა მან ფეხი, კანიბალმა უპასუხა, რომ ის ძალიან გამწარებულია. მაგლიორმა ასევე აღიარა, რომ მას „ცოფიან ძაღლს“ ეძახიან.

მაგლიორის თქმით, მან მუსულმანი ავტობუსში შენიშნა. სხვა მგზავრებთან ერთად გადაწყვიტა მამაკაცს გასწორებოდნენ. ძირითადად ქრისტიანებისაგან შემდგარმა ჯგუფმა მძღოლს გაჩერება მოსთხოვა, რის შემდეგაც მუსულმანი გზაზე ჩაათრიეს და ცემა დაუწყეს. ერთ მომენტში, მაგლიორმა მამაკაცს ბენზინი გადაასხა და ცეცხლი წაუკიდა.

მაგლიორს მოკლულის შეჭმაში ხელი არავინ შეუშალა. პირიქით, დამსწრეები მიდიოდნენ, მხარზე ურტყამდნენ ხელს და აქებდნენ. მკვლელობა ბურუნდელ მშვიდობისმყოფელთა თვალწინ მოხდა. ერთ-ერთ ჯარისკაცს გული აერია. სამხედროებმა ჯგუფი მხოლოდ კანიბალიზმის შემთხვევის შემდეგ დაშალეს.

როგორც პოლ ვუდი წერს, მას მომხდარის ვიდეოც აქვს, მაგრამ „ბი-ბი-სიმ“ არ გამოაქვეყნა. ჟურნალისტის თქმით, ერთ-ერთ კადრში აღბეჭდილია ხორცით სავსე პირით მომღიმარი მაგლიორი.

ზოგიერთი მონაცემით, ქვეყნის ერთ-ერთი ხელმძღვანელი ასევე კანიბალი იყო. საუბარია ჟან-ბედელე ბოკასეზე, რომელმაც 1976 წელს თავი ცენტრალური აფრიკის რესპუბლიკის იმპერატორად გამოაცხადა.