სოჭი - რუსეთის კოლონიალიზმთან ბრძოლა

მსოფლიო - 20:09, 12 Jan, 2014

4549

სლოვაკური გაზეთი „Aktuality“ და ანალიტიკურ სტატიას უძღვნის „რუსეთის N1 მტრის“ დოკუ უმაროვის ცნობილ განცხადებას.

სტატიაში აღნიშნულია, რომ ვოლგოგრადის ცნობილი ტერაქტების შემდეგ, რუსეთი კვლავ ტერორიზმის შიშის ქვეშაა. დოკუ უმაროვი, რომელიც არაერთხელ გამოაცხადეს მკვდრად, იმუქრება, რომ ყველა ძალისხმევას გამოიყენებს, რათა ჩაშალოს სოჭის ოლიმპიადა.

„რუსეთის პრეზიდენტმა ვოლგოგრადის ტერაქტის შემდეგ განაცხადა, რომ ტერორისტებს ბოლომდე გაანადგურებს. ჩეჩნეთის პრეზიდენტმა რამზან კადიროვმა, კერ კიდევ ივნისში დაიფიცა, რომ ოლიმპიადის გახსნამდე მოკლავს დოკუ უმაროვს. რუსეთის მოსახლეობის უმრავლესობას ეშინია უმაროვის. მაგრამ ეს პიროვნება ჯერჯერობით მოუხელთებელია. ის ახლაც კავკასიაში მუსულმანური ემირატის ლიდერად ითვლება,“ - წერს გაზეთი.

სტატიაში აღნიშნულია, რომ უმაროვმა სოჭის ოლიმპიადას „მუსულმანთა ძვლებზე გამართული სლავების სპორტული თამაშები“ უწოდა, რადგან თვლის, რომ აღნიშნული მიწები იმთავითვე მუსულმანურ მოსახლეობას ეკუთვნოდა.

გაზეთი სვამს კითხვას, შესძლებს თუ არა უმაროვი ვოლგოგრადის მსგავსი აქტების გამეორებას სოჭში. სამხრეთ ილინოისის უნივერსიტეტის პროფესორი რობერტ ვეერი აცხადებს, რომ დოკუ უმაროვი უმრავლეს შემთხვევებში იარაღად იყენებს არა კავკასიელებს, არამედ ადგილობრივ მაცხოვრებლებს. მისი განცხადებით, ამას რუსეთის ხელისუფლებაც აცნობიერებს, რაც უფრო საფუძვლიანს ხდის უმაროვის სიტყვებს.