ბერლინის პოლიციამ სავაჭრო ქსელ Aldi-ის მარკეტებში 140 კილოგრამი კოკაინი აღმოაჩინა.

პოლიციელთა თქმით, ამოღებული ნარკოტიკის დიდი ნაწილი კიოპენიკის რაიონში ორ სუპერმარკეტში აღმოჩნდა. ყუთებში ბანანების ქვეშ 100 კილოგრამი კოკაინი აღმოჩნდა ჩაწყობილი.

ნაპოვნი კოკაინის ღირებულება 4 – 5 მილიონ ევროდ ფასდება.

წინასწარი მონაცემებით, ნარკოტიკი გერმანიაში უკანონოდ სამხრეთ ამერიკიდან შეიტანეს. იმის შესახებ, თუ ვის ეკუთვნის კოკაინის პარტია და როგორ მოხვდა პროდუქტების მაღაზიებში, ცნობილი არ არის. როგორც გაზეთი Berliner Morgenpost წერს, ნარკოტიკი მარკეტის თანამშრომლებმა ხილის ყუთების გახნისას აღმოაჩინეს. პოლიციაში არ გამორიხავენ, რომ კოკაინის ტრანსპორტირებისას მოხდა შეცდომა და ის შემთხვევით, ბერლინის სუპერმარკეტებში გაგზავნეს.