ჩრდილოეთ კორეის ლიდერის, კიმ ჩენ ინის მამიდის თვითმკვლელობის შესახებ, სამხრეთ კორეული გამოცემა „ჩოსონ ილბო“ იტყობინება.

ასეთი განაცხადის საფუძველი გახდა ის, რომ კიმ გიონ ხი დიდი ხნის მანძილზე არ გამოჩენილა. გაზეთის წყარო ასევე ვარაუდობს, რომ კორეის სახალხო-დემოკრატიული რესპუბლიკის მეთაურის მამიდა შესაძლოა გულის შეტევით გარდაცვლილიყო. სამხრეთ კორეული დაზვერვის წარმომადგენელმა გამოცემასთან საუბარში აღნიშნა, რომ უწყება ახლა ცდილობს გაარკვიოს ხომ არ წავიდა კიმ გიონ ხი საზღვარგარეთ სამკურნალოდ.

ოფიციალური ფხენიანი კიმ გიონ ხის ავადმყოფობის ან სიკვდილის შესახებ არაფერს იტყობინება.

2013 წლის დეკემბერში, ის თავისი ძმის, კიმ ჩენ ირის გარდაცვალების ორიწლისთავისადმი მიძღვნილ ღონისძიებებზე არ გამოჩენილა. ამან გამოიწვია ეჭვი მისი ავადმყოფობის, ან ჩრდილოეთ კორეის საზოგადოებრივ ცხოვრებაში მონაწილეობაზე იძულებით უარზე. კიმ ჩენ ინის მამიდა ბოლოს სექტემბერში ნახეს.

კორეის სახალხო-დემოკრატიულ რესპუბლიკაში, ქვეყნის მეთაურის, კიმ ჩენ ინის ბიძა, კიმ გიონ ხის მეუღლე ჩან სონ თჰეკი სიკვდილით დასაჯეს. ყველა თანამდებობიდან გათავისუფლებული ჩან სონ თჰეკი ღალატში დაადანაშაულეს. დიქტატორის ბიძა მნიშვნელოვან პოსტს - თავდაცვის სახელმწიფო კომიტეტის თავმჯდომარის მოადგილე, იკავებდა და კიმ ჩენ ირის გარდაცვალების შემდეგ კორეის სახალხო-დემოკრატიულ რესპუბლიკაში ხელისუფლების ყველაზე გავლენიან წევრად ითვლებოდა

კიმ გიონ ხი 1946 წელს დაიბადა. ის კიმ ჩენ ირის და და ჩრდილოეთ კორეის ფუძემდებლის კიმ ირ სენის შვილია. ის არმიის გენერლის წოდებას ატარებს და რესპუბლიკის მშრომელთა პარტიის ცენტრალური კომიტეტის პოლიტბიუროში შედის.