სამაუწყებლო კომპანია „რუსთავი–2“–ის გენერალური დირექტორი ნიკა გვარამია დამატებით ეხმიანება საკუთარ გადაწყვეტილებას საახალწლო ეთერიდან პოლიტიკოსთა მილოცვების მოხსნის შესახებ და წერს, რომ იმ აღქმების გამო, რომლებიც ხშირად არასწორია, პროგრესზე უარის თქმას ტელევიზია არ აპირებს.

ნიკა გვარამია იმასაც აღნიშნავს, რომ სულ მალე ის ადამიანები, ვინც „პოლიტიკური აგზნებულობის გამო“ უხამხობებს წერენ ამ გადაწყვეტილების მიღებისთვის, სულ მალე მისი მისამართით გაგზავნილი სამადლობელი წერილების ავტორი გახდება:

„ძვირფასო მეგობრებო, როგორიც არ უნდა იყოს აღქმა, ჩვენთვის პრინციპული და სწორი გადაწყვეტილებების მიღებისას, ვერ ვიქნებით მძევალი ვერც არსებული პოლიტიკური კონტექსტის და ვერ რუსთავი 2ის ბიოგრაფიის (9 თუ 15 წლიანის). წინააღმდეგ შემთხვევაში, ვერც ერთ სწორ გადაწყვეტილებას ვეღარ მივღებთ. და აღქმების გამო (ხშირად არასწორი) პროგრესზე უარის თქმას ნამდვილად არ ვაპირებთ.

ერთი რამე ვიცი ზუსტად, ვისაც ახლა პოლიტიკური აღგზნება გაწუხებთ და უხამსობებს იწერებით, ისინი იქნებით პირველი მადლობის წერილების ავტორები ჩემი მისამართით. და ეს მას შემდეგ მოხდება, რაც 3-5-10 წლის მერე თქვენთვის არმოსაწონი პოლიტიკოსი არ შემოგეჭრებათ საახალწლო პრივატულობაში არც რ2ის და არც სხვა (დარწმუნებული ვარ) კომერციული ტელევიზიის ეთერით. მაშინ არავის აღარ ემახსოვრება ამ გადაწყვეტილების მოტივებზე უაზრო და ზღვარგადასული მკითხაობა“, – წერს ნიკა გვარამია „ფეიბუქზე“.