უკრაინული მედიის ცნობით, ევრომაიდანის დემონსტრანტები დღეს სამთავრობო შენობების პიკეტირებას დაიწყებენ.

ფრაქცია "თავისუფლების" ლიდერის ოლეგ ტიაგნიბოკის განცხადებით, ოპოზიცია დღეს გადაწყვეტს, მოხდება თუ არა უმაღლესი რადას მუშაობის ბლოკირება. ამასთან, უკრაინის პრეზიდენტის ვიქტორ იანუკოვიჩის ვლადიმერ პუტინთან შეხვედრის გასაპროტესტებლად უკრაინის ოპოზიცია მაიდანზე მორიგ სახალხო აქციას გამართავს.

მოსკოვში დღეს რუსეთ-უკრაინის სახელმწიფოთაშორისო კომისიის სხდომა გაიმართება. სხდომის თავმჯდომარეები რუსეთისა და უკრაინის პირველი პირები – ვლადიმერ პუტინი და ვიქტორ იანუკოვიჩი იქნებიან.

ამასთან, აშშ-ის კონგრესში "უკრაინელი ხალხის დემოკრატიული და ევროპული სწრაფვისა და საკუთარი მომავლის დაშინებისა და შიშის გარეშე არჩევის უფლების" მხარდამჭერი რეზოლუციის პროექტი შევიდა.

რეზოლუციის პროექტი უკრაინის ხელისუფლებას მოუწოდებს პატივი სცეს მოქალაქეების უფლებას.

ამასთან, კონგრესმენები ასევე მოუწოდებენ იანუკოვიჩს, პასუხი მოსთხოვოს ყველა იმ დამნაშავეს, რომელიც მშვიდობიანი მიტინგის დარბევაში დამნაშავეა.