უკრაინული მედიის ცნობით, ევროკავშირთან ასოცირების ხელშეკრულების გაფორმების შემდეგ, ევროკავშირი არ გამორიცხავს უკრაინისთვის კომპენსაციის გამოყოფის საკითხის გადაჭრის შესაძლებლობას.

"უკრაინის პრეზიდენტთან შეხვედრისას ჩვენ განვიხილეთ საკითხები, თუ რა მოკლევადიანმა მიზეზებმა შეუშალეს ხელი უკრაინას ასოცირების ხელშეკრულების ხელმოწერაში. მიმაჩნია, რომ ევროკავშირის, საერთაშორისო ფინანსური ინსტიტუტებისა და კომერციული კრედიტების ხარჯზე შეგვიძლია ამ საკითხების მოგვარება", - განაცხადა უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში კეტრინ ეშტონმა.

აღნიშნულის შესახებ უკრაინული მედია იუწყება.

ამასთან, ბრიუსელში ევროკავშირის წევრი ქვეყნების საგარეო საქმეთა მინისტრების შეხვედრის წინ უმაღლესმა წარმომადგენელმა ასევე განაცხადა, რომ უკრაინის გარეშემო შექმნილი ვითარება რუსეთისა და ევროკავშირის ურთიერთობაზე და იანვარში, რუსეთ-ევროკავშირის სამიტის გამართვაზე არ აისახება.