არსენი იაცენიუკმა პროსახელისუფლებო მიტინგის მონაწილეებს ჯგუფ "Океан Эльзы"-ს კონცერტზე დასწრება შეთავაზა, რომელიც შაბათს დამოუკიდებლობის მოედანზე 20:00 საათზე (უკრაინის დროით) გაიმართება.

„ჩვენ ამ ხალხისთვის სპეციალურად გამოვყოფთ ადგილს. დაე, მოვიდნენ მაიდანზე და კონცერტზე. ეს არ იქნება „რეგიონები“, იქ არავინაა იანუკოვიჩის, რიბაკისა და აზაროვის გარდა. ეს ჩვენი ძმები და დები არიან, ისინიც უკრაინელები არიან, იმის მიუხედავად, თუ რა ენაზე ლაპარაკობენ და საიდან არიან წარმოშობით“, - განაცხადა ფრაქცია „ბატკივშინას“ ლიდერმა არსენი იაცენიუკმა.

პარტია „უდარის“ ლიდერმა ვიტალი კლიჩკომ თავის მხრივ „მაიდანელებს“ მოუწოდა, რომ არ აჰყვნენ არანაირ პროვოკაციას და არ გამოავლინონ აგრესია.

„ვინც თუნდაც მცირე აგრესიას გამოავლენს, მას ჩემთან ექნება საქმე“, - დაიმუქრა კლიჩკომ.

ვრცელდება ინფორმაცია, რომ შაბათ-კვირას ხელისუფლება კიევში 200 ათასი კაცის შეკრებას აპირებს. ხოლო ოპოზიცია, სახალხო შეკრებას კვირას, 12:00 სააათზე გამართავს.