უკრაინის უშიშროების სამინისტროს ხელმძღვანელმა იაკიმენკომ ФСБ–ს კონსულტანტები მოიწვია, რათა გაეცნოს მეთოდებს, როგორ დაშალოს ევრომაიდანი სპეციალური აეროზოლების გამოყენებით, – ეს მოსაზრება უკრაინის რადას დეპუტატმა გენადი მოსკალმა გამოთქვა:

„ცოტა ხნის წინ უკრაინის უშიშროებიდან მივიღეთ სარწმუნო ინფორმაცია: რადგან ჩვენი სამართალდამცველები ვერ უმკლავდებიან ევრომაიდანს, ალექსანდრე იაკიმენკომ მშვიდობიანი დემონსტრაციების დაშლის სპეციალისტები რუსეთიდან მოიწვია“, – განაცხადა მოსკალმა.

მისივე თქმით, ФСБ–ს დელეგაციასთან ერთად უკრაინაში ჩავიდნენ კონსულტანტები, რომლებმაც დაამუშავეს უახლესი ტექნოლოგიის გამოყენებით დემონსტრაციების დაშლის მეთოდი. საკითხი ეხება აეროზოლს სპეციალური გაზის გამოყენებით.

ვერსიის მიხედვით, აეროზოლს პროვოკატორებს გადასცემენ, რომლებიც დემონსტრანტებს შეერევიან, შევლენ კიევის საქალაქო საბჭოს, პროფკავშირების და სხვა, დემონსტრანტების მიერ დაკავებულ შენობებში და აეროზოლს გააფრქვევენ შტურმის დაწყების წინ. აეროზოლში შერეული აირი იწვევს თავბრუსხვევას, საერთო სისუსტეს, ახდენს წინააღმდეგობის გაწევის უნარის პარალიზებას.

რადას დეპუტატმა განაცხადა, რომ მოვლენათა ამ სცენარით განვითარების შემთხვევაში პასუხისმგებლობა დაეკისრება უკრაინის უშიშროების სტრუქტურის ხელმძღვანელს.

დეპუტატის განცხადებას ოპერატიულად უპასუხა უშიშროების პრესსამსახურმა:

„ამ განცხადებას ვაფასებთ, როგორც უპასუხისმგებლოსა და პროვოკაციულს, მსგავსი არაფერი დაგეგმილა და ვერც დაიგეგმებოდა“, – აცხადებენ უწყებაში.