ჯიმ საკის თქმით, კონკრეტული გადაწყვეტილება ჯერჯერობით არ მიუღიათ, თუმცა, რამდენიმე ვარიანტი განხილვის პროცესშია.

"ჩვენი მთავარი გზავნილი უკრაინისთვის იყო და არის ევროკავშირთან და საერთაშორისო სავალუტო ფონდთან მოლაპარაკებების განახლება. ასევე სამართლისა და ძირითადი ფასეულებების დაბრუნება უკრაინელი ხალხისთვის. ჩვენ ყველანაირ პოლიტიკურ ვარიანტს, მათ შორის სანქციებსაც განვიხილავთ“, - განაცხადა ჯიმ საკიმ.

„ბერკუტის“ მიერ ბარიკადების დაშლის ფაქტს ეხმაურება თეთრი სახლი და მთავრობის ქმედებებს კიდევ ერთხელ გმობს. „შეერთებული შტატები გმობს კიევში, ღამით მომხდარ ფაქტს, უკრაინის მთავრობის პასუხი მშვიდობიან აქციებზე ბოლო ორი კვირის განმავლობაში, ჩვენთვის მიუღებელია.

შეკრების და გამოხატვის თავისუფლებას ყველამ უნდა სცეს პატივი. ასევე შეშფოთებულები ვართ იმით, თუ როგორ მიმდინარეობს ოპოზიციური პარტიებისა და მედიასაშუალებების რეიდები“, - განაცხადა ჯოშ ერნესტმა.

უკრაინაში ვიზიტის დროს იანუკოვიჩთან შეხვედრის დეტალები შეაფასა ევროკომისარმა, ქეთრინ ეშტონმა. მისი თქმით პრეზიდენტს სურს, ხელი მოაწეროს ევროკავშირთან შეთანხმებას, თუმცა, მისი სიტყვები საქმით უნდა დამტკიცდეს. „ჩვენ მზად ვართ მხარი დავუჭიროთ დიალოგის პროცესს, ვფიქრობ პრეზიდენტი დაინტერესდა თუ რა შეგვიძლია გავაკეთოთ ამ კუთხით.

პრეზიდენტისგან ბოლო 24 საათის განმავლობაში ორჯერ მოვისმინე, რომ ევროკავშირთან შეთანხმების ხელმოწერა სურს. მან მიამბო გრძელი ისტორია იმისა, თუ როგორ სურდა ევროკავშირთან მჭიდრო ურთიერთობები. მთავარი მაინც არის ის, რომ მისი სიტყვები საქმით დადასტურდეს“, - განაცხადა ქეთრინ ეშტონმა.