უკრაინის დედაქალაქში გუშინ ღამით ჩატარებულ წმენდას დამოუკიდებლობის მოედანზე ქვეყნის შინაგან საქმეთა უწყებამ უკვე უწოდა „ქალაქის კეთილმოწყობის დაწყება“.

„ბერკუტის“ იერიშმა ევრომაიდანზე უკურეაქცია გამოიწვია: ამ დროისთვის ევრომაიდანი ხალხით ივსება. მასალას თანდართული ფოტო კიევში ამ დროისთვის არსებულ სიტუაციას ასახავს.

ოპოზიციის ლიდერები, რომლებმაც ღამე მომიტინგეებთან ერთად გაატარეს, მოსახლეობის უფრო დიდ ნაკადს ელიან. იმის გამო, რომ გუშინ ღამით დახურული იყო მეტროს სადგურები, კიეველთა უმრავლესობამ მიტინგზე მისვლა ვერ შეძლო. ხალხის ნაკადი დილიდან იზრდება მას შემდეგ, რაც სოციალური ქსელებითა და სხვა საკომუნიკაციო საშუალებებით დარბევის შესახებ ინფორმაცია გავრცელდა.