უკრაინის ოპოზიციის ერთერთი ლიდერის არსენ იაცენუკის ვებგვერდზე აღნიშნულია, რომ შესაძლოა, ხელისუფლებამ ღამის საათებში ევრომაიდნის გაწმენდა სცადოს:

„როგორც ეროვნული წინააღმდეგობის შტაბისთვის გახდა ცნობილი, დაახლოებით ღამის 01:00 საათისთვის დაგეგმილია ევრომაიდნის გაწმენდის ოპერაცია შინაგანი ჯარისა და „ბერკუტის“ მონაწილეობით. პროვოკატორთა როლში გამოდიან „რეგიონების“ დეპუტატები, რომლებიც ამ დროისთვის უკვე მობილიზებული არიან საამისოდ“, - აღნიშნულია ვებგვერდზე.

წინააღმდეგობის შტაბი მოუწოდებს კიეველებს, მივიდნენ ევრომაიდანზე, რადგან რაც მეტი ადამიანი იდგება ღამით იქ, მით უფრო ნაკლებმოსალოდნელია შეტევა დემონსტრანტებზე.

შტაბი თხოვნით მიმართავს მედიასაშუალებებსაც, დატოვონ რაც შეიძლება, მეტი ჟურნალისტი მაიდანზე, რადგან „ეს განიხილება, როგორც მილიციელთა ძალადობის შემაკავებელი ფაქტორი“.