თბილისში ვაშლიჯვრისა და ნუცუბიძის დამაკავშირებელ გზაზე, სადაც გზის გაყვანის სამუშაოების გამო ტერიტორია გადაკეტილია, დიდი ნაპრალები გაჩნდა. როგორც აღმოჩნდა, მიმდებარე ადგილი დამეწყრილია და ახლა ტერიტორიაზე სეისმოლოგები მუშაობენ.

გეოლოგების თქმით, ადგილობრივი მოსახლეობა დიდი საფრთხის წინაშე დგას. მთა ორ ნაწილად გაიყო, მეწყერული პროცესი კი ძალიან ჩქარა ვითარდება. მათი განმარტებით, აუცილებელია დროულად შეწყდეს მიმდინარე სამუშაოები, რათა უმძიმესი შედეგი არ დადგეს:

"ფაქტობრივად მეწყერი დინამიკაშია მოსული და მისი გაჩერება შეუძლებელია, ახლა გავსინჯეთ მეწყრის სიგრძე და ის დაახოლებით არის 10 მეტრი, დინამიკაში მოსულია ნახევარი მილიონი კუბი, რომელიც დღეს თუ ხვალ აუცილებლად ჩამოვა და მას საინჟინრო გადაწყვეტილება სჭირდება. ეს არ არის მხოლოდ და მხოლოდ მოწყვეტილი მასის მონაკვეთი, იმიტომ, რომ ადამიანის ჩარევის გამო, ამ სამშენებლო სამუშაოებისა და არასწორი დაგეგმარების გამო, როგორც მოხდა ვერეს ხეობის ტრაგედიის შემთხვევაში, ანალოგიურია აქაც. ახლა დინამიკაშია მეწყერი მოსული, ამის გაჩერება კედლით, წვიმების დროს, შეუძლებელია" - განაცხადა სეისმოლოგმა.