მსოფლიოს საუკეთესო ფეხბურთელის ნომინანტთა სამეულში შევიდნენ "ბარსელონას" ფორვარდი ლიონელ მესი,  მადრიდის "რეალის" თავდამსხმელი კრიშტიანუ რონალდუ და მიუნხენის "ბაიერნის" ნახევარმცველი ფრანკ რიბერი.

ეს ფეხბურთელები  პრეტენდენტთა 23-კაციანი სიიდან შეარჩიეს. სამეული განისაზღვრა მთავარი მწვრთნელების, ეროვნული ნაკრებების კაპიტნებისა და მედიის წარმომადგენლების ხმის მიცემის საფუძველზე.

„"ოქროს ბურთის" გადაცემის ცერემონია ფიფას ორგანიზებით შვეიცარიის ქალაქ ციურიხში, 2014 წლის 13 იანვარს გაიმართება.

ბოლო ოთხი წლის მანძილზე ამ პრიზის მფლობელი მესი ხდებოდა. რონალდუმ „ოქროს ბურთი“ 2008 წელს,  "მანჩესტერ იუნაიტედის" შემადგენლობაში მიიღო. რიბერი კი კარიერაში პირველად შევიდა საუკეთესო ფეხბურთელის ნომინანტთა სამეულში.

ფიფამ ასევე დაასახელა წლის საუკეთესო მწვრთნელის პრიზის სამი ნომინანტი. ჯილდოსთვის იბრძოლებენ „მანჩესტერ იუნაიტედის“ ყოფილი მწვრთნელი ალექს ფერგიუსონი, ასევე „ბავარიის“ ყოფილი მეთაური იუპ ჰაინკესი და დორტმუნდის „ბორუსიის“ მწვრთნელი იურგენ კლოპი.