კიევში მთელი ღამის განმავლობაში გაგრძელდა იმპროვიზირებული კონცერტი, რომელშიც უკრაინელი შემსრულებლები მონაწილეობდნენ. რამდენიმე ათასმა ადამიანმა გაითვალისწინა ოპოზიციის ლიდერების თხოვნა და ევრომაიდანზე დარჩა, რათა ხელისუფლებისთვის პროვოკაციის საშუალება არ მიეცათ.

ოპოზიციის ლიდერებმა შტაბში გვიან ღამით გამართულ პრესკონფერენციაზე განაცხადეს, რომ იანუკოვიჩი კიევში საგანგებო მდგომარეობის შემოღებას გეგმავს და სწორედ ეს არის პუტინთან მისი შეთანხმების ნაწილი.

ოპოზიციის ლიდერების გადაწყვეტილებით, დღეიდან უკვე სამთავრობო შენობების პიკეტირება იწყება. თანამშრომლებს, რომლებიც შენობებში შევლენ ან იქედან გამოვლენ, გადაადგილების უფლებას არ შეუზღუდავენ, მაგრამ მათ სიარული ფეხით მოუწევთ და, სავარაუდოდ, სირცხვილის კორიდორებში გაატარებენ.

გუშინ მთელი ღამის განმავლობაში ათეულობით დემონსტრანტი „ბერკუტის“ დისლოკაციის ადგილთანაც იმყოფებოდა, სადაც კედელზე მიმაგრებული იყო პლაკატები: „ნუ მირტყამ, შემიყვარე!“.