უკვე მესამე კვირაა კახი კავსაძე პირველ საუნივერსიტეტო კლინიკაში წევს და მკურნალობას გადის. მსახიობი, თებერვლის შუა რიცხვებში, კლინიკაში, ლევან რატიანმა პირადი გადაწყვეტილებით გადაიყვანა. არტისტი კლინიკაში ფილტვების ანთებით მოთავსდა და როგორც მაშინ რატიანი აცხადებდა, სახეზე იყო მისი ძირითადი დაავადებების გართულებები. სუნთქვის მწვავე უკმარისობა, ძილიანობა…

როგორც “პრაიმტაიმთან” კახის უმცროსი ძმა, იმერი კავსაძე ამბობს, მდგომარეობა უკეთესად არის და მსახიობს რამდენიმე დღეში სახლში გამოწერენ.

იმერი კავსაძე: – ძნელი სათქმელია, ფილტვების ანთება საიდან დაემართა. ჩვენ ახალგაზრდები აღარ ვართ… ლევან რატიანი იყო მოსული კახის სანახავად. ხშირად გვეკონტაქტება და დაინტერესებულია მისი ჯანმრთელობით. არაჩვეულებრივი პიროვნებაა. ჭეშმარიტი მკურნალი ექიმია.

ჩვენ დედა ექიმი გვყავდა, ამიტომ მედიკოსებს ვაფასებთ. მოვიდა, ნახა და მაშინვე თქვა, მიმყავს იმიტომ, რომ კლინიკაში მკურნალობა ჯობს და იქ ყოველგვარ კომფორტს შევუქმნითო. ისეთი თვალებით შეხედა, რომ კახი არ გაძალიანებია, გაჰყვა… პატივს სცემს ლევანს. ამ ექიმის ჩვენდამი დამოკიდებულების გამო, მასთან დავალებულები ვართ. ამდენად, რასაც გვეტყვის, ვასრულებთ.

შეგახსენებთ, 28 ნოემბერს კახი კავსაძეს კორონავირუსი დაუდასტურდა და ის მკურნალობის სამ კვირიან კურსს კლინიკაში გადიოდა.

პრაიმტაიმი