ცენტრალური აფრიკის რესპუბლიკაში, სადაც სისხლისმღვრელი შიდა კონფლიქტი გაღვივდა, 1200 ფრანგ სამხედრო მოსამსახურეს და აფრიკული კავშირის 3600 ჯარისკაცს შეიყვანენ. სამხედრო ოპერაცია გაეროს უსაფრთხოების საბჭოს სანქციის მიღების შემდეგ დაიწყო.

საფრანგეთმა ცენტრალური აფრიკის რესპუბლიკაში  სამხედრო ოპერაცია დაიწყო. „ჩვენი სამხედრო კონტიგენტი ცენტრალური აფრიკის რესპუბლიკის დედაქალაქ ბანგიში ქუჩებში პატრულირებას შეუდგა“, - განაცხადა 6 დეკემბერს, საფრანგეთის თავდაცვის მინისტრმა ჟან-ივ ლე დრიანმა რადიოსადგურ RFI-სთან ინტერვიუში. საფრანგეთის პრეზიდენტმა ფრანსუა ოლანდმა თავისმხრივ ხაზი გაუსვა, რომ აქციის მიზანია - ჰუმანიტარული კატასტროფის აღკვეთა ცენტრალური აფრიკის რესპუბლიკაში.

სამხედრო ჩარევა აუცილებლი გახდა მას შემდეგ, რაც ცენტრალური აფრიკის რესპუბლიკაში დაიწყო სისხლისმღვრელი შეტაკებები ხელისუფლების ხელში ჩამგდებ მუსულმან ამბოხებულთა ორგანიზაცია „სელეკას“ მებრძოლებსა და ქრისტიანულ მილიციას შორის. საერთაშორისო ორგანიზაცია უნისეფის მონაცემებით, ორივე მხარე კონფლიქტში 3500 ბავშვ-ჯარისკაცს იყენებს. ოთხშაბათს გაეროს უსაფრთხოების საბჭომ ცენტრალური აფრიკის რესპუბლიკაში 1200 ფრანგი სამხედრო მოსამსახურის და აფრიკული კავშირის 3600 ჯარისკაცის განთავსების შესახებ სანქცია გასცა.