„რუსთავი2“-თან ექსკლუზიურ ინტერვიუში კიევის პატრიარქმა საკმაოდ ვრცლად ისაუბრა ბოლო 16 წლის განმავლობაში კიევში და ზოგადად ქვეყანაში შექმნილ საკმაოდ რთულ ვითარებაზე.

ფილარეტმა აღნიშნა, რომ მოსახლეობის დიდი ნაწილის უკმაყოფილება გამოიწვია 1 დეკემბერს, სტუდენტების მშვიდობიანმა აქციის ძალისმიერად დაშლამ. მისი ინფორმაციით, სტუდენტები საკმაოდ მშვიდობიანი ფორმებით აპროტესტებდნენ იმას, რომ უკრაინის პრეზიდენტმა ვილნიუსში ხელი არ მოაწერა ევროკავშირთან ასოცირების დოკუმენტს:

„ჩვენი პოზიცია ხალხთანაა, მოსახლეობა მოედანზე გამოვიდა, რადგან უკრაინამ უარი თქვა ევროკავშირთან შეთანხმების გაფორმებაზე. მთელი წლის განმავლობაში ხალხი ამისათვის ემზადებოდა და როდესაც ვილნიუსში იანუკოვიჩმა ხელი არ მოაწერა, ხალხი გაბრაზდა.

პირველები სტუდენტები გამოვიდნენ ქუჩაში, მათ არ უნდოდათ ოპოზიციასთან გაერთიანება, რადგან მშვიდობიან აქციას აწყობდნენ, რომ გამოეხატათ თვისი სურვილი ევროპაში გაერთიანებასთან დაკავშირებით. მაგრამ ეს ბავშვები დაარბიეს და სცემეს.

ამის შემდეგ აქციებმა უკვე სხვა სახე მიიღო. მათ შეუერთდნენ ოპოზიციის წარმომადგენლები და სიტუაცია იქამდე მივიდა, რომ ხალხმა მთავრობის გადადგომის მოთხოვნა და ხელისუფლების შეცვლა მოითხოვა“, - ამბობს ინტერვიუში კიევის პატრიარქი.

კიევის პატრიარქმა ასევე ისაუბრა საქართველოზე და უკრაინა-რუსეთის ურთიერთობებზე. პატრიარქმა ფილარეტმა აღნიშნა, რომ ვილნიუსში უკრაინის პრეზიდენტის მიერ ხელმოწერაზე უარის თქმაში საკმაოდ დიდი გავლენა რუსეთის იყო:

„რუსეთი სხვადასხვა მეთოდებს იყენებს იმისთვის, რომ უკრაინა საბაჟო კავშირში გააწევრიანოს და შექმნას საფუძველი ახალი იმპერიისთვის. შემდეგ ეს კავშირი იქნება სლავური ან სხვა სახელწოდების და დაუპირისპირდება ევროკავშირს. რუსეთის ფაქტორმა დიდი გავლენა მოახდინა ამ გადაწყვეტილებაზე და შედეგიც სახეზეა. სწორედ ამიტომ არის ხალხი გამოსული, რომ რუსეთმა თვისი ვერ გაიტანოს. ჩვენ ძალიან ვაფასებთ მიხეილ სააკაშვილის გამოსვლას გენერალურ ასამბლეაზე. მან სიმართლე ილაპარაკა“, - აღნიშნა „რუსთავი 2“-თან ინტერვიუში კიევის პატრიარქმა ფილარეტმა.