დღეიდან თბილისის, ქუთაისისა და რუსთავის გარდა, ქვეყანაში სასწავლო პროცესი საკლასო ოთახებში განახლდა.

განათლების სამინისტროს ინფორმაციით, მიუხედავად სწავლის პროცესის საკლასო ოთახში გადანაცვლებისა, მშობელს აქვს უფლება, სურვილის შემთხვევაში გააკეთოს არჩევანი და ონლაინ რეჟიმში დარჩეს. ეს ფორმატი შეეხება მხოლოდ ზუგდიდს, თელავს, ზესტაფონს, გარდაბანს, ფოთს, მარნეულს, ქობულეთს, ბათუმსა და გორს. აღნიშნული ქალაქების საჯარო სკოლების მოსწავლეების მშობლებს ონლაინ რეჟიმში გაკვეთილების გაგრძელებისთვის შეეძლებათ მიმართონ სკოლის ადმინისტრაციას და გაიარონ რეგისტრაცია სსიპ-განათლების მართვის საინფორმაციო სისტემის მიერ შექმნილ ვებგვერდზე - www.Online.emis.ge.

განათლების სამინისტროს ცნობით, აპედაგოგები ორ ფორმატში გაკვეთილების ჩატარების შემთხვევაში დამატებით ანაზღაურებას აიღებენ.

სკოლას დამოუკიდებლად შეუძლია განსაზღვროს გაკვეთილების ხანგრძლივობა, დაწყების დრო და დაგეგმოს მოსწავლეებისთვის მორგებული ცვლები.