მოვუწოდებთ ხელისუფლებას, გააცნობიეროს მისი პოლიტიკის პრობლემურობა - სამოქალაქო სექტორი რელიგიის საკითხთა სახელმწიფო სააგენტოს გაუქმებას ითხოვს

საზოგადოება - 13:56, 18 Jan, 2021

1124

ბუკნარში მომხდარი რელიგიური დაპირისპირების გამო არასამთავრობო ორგანიზაციები ხელისუფლებას მიმართავენ მოთხოვნით, გაუქმდეს რელიგიის საკითხთა სახელმწიფო სააგენტო.

როგორც ადამიანის უფლებათა სწავლებისა და მონიტორინგის ცენტრის თანასწორობის პოლიტიკის პროგრამის დირექტორი თამთა მიქელაძე აცხადებს, აღნიშნული სააგენტო რელიგიურ დისკუსიებს აფერხებს და ის სუს-ის პოლიტიკური ორგანიზაციაა:

"მოვუწოდებთ ხელისუფლებას, გააცნობიეროს მისი პოლიტიკის პრობლემურობა, სისტემური ჩავარდნები და დაიწყოს ღია და დემოკრატიული რეფორმების პროცესი, რაც ჩვენი შეფასებით, პირველ რიგში მოითხოვს რელიგიის საკითხთა სახელმწიფო სააგენტოს გაუქმებას, რომელიც გახდა ბარიერი ამ საკითხებზე სალაპარაკოდ, ამ საკითხებზე სახელმწიფო უწყებებთან დისკუსიის გასახსნელად, რადგან ის ახშობს დისკუსიის ყველა მცდელობას, ჩვენი შეფასებით, ეს უწყება არის სუსის პოლიტიკური ორგანიზაცია, რომელიც არსებობს იმისთვის, რომ აკონტროლოს რელიგიური ორგანიზაციები და არა გარდაქმნას, ისედაც არსებული უთანასწორო პოლიტიკა ამ სფეროში" - განაცხადა მიქელაძემ.

საქართველოს ევანგელურ–ბაპტისტური ეკლესიის ეპისკოპოსის რუსუდან გოცირიძის შეფასებით, რელიგიის საკითხთა სახელმწიფო სააგენტო ძირითადად მუსლიმი თემის კონტროლს ცდილობს და ის ხელისუფლების სტრატეგიის გამტარია:

"რელიგიის საკითხთა სახელმწიფო სააგენტოს, კონტროლის ძირითადი ინტერესი არის მუსლიმური თემი, სააგენტო არის ხელისუფლების სტრატეგიის გამტარი" - განაცხადა გოცირიძემ.

"ბოლო ათი წლის განმავლობაში ჩვენ ვხედავთ ინტენსიურ მიზანმიმართულ დევნას მუსლიმი თემისას და ეს გამოაჩენს ხარვეზებს სახელმწიფოს მხრიდან უმცირესობებისადმი პოლიტიკის გატარების პროცესში" - აღნიშნა ქართველ მუსლიმთა კავშირის წარმომადგენელმა ზაზა მიქელაძემ.

რელიგიის საკითხთა სახელმწიფო სააგენტოს გაუქმების მოთხოვნა პრემიერ-მინისტრ გიორგი გახარიასა და პარლამენტის თავმჯდომარეს არჩილ თალაკვაძეს უახლოეს დღეებში გადაეგზავნებათ.