მორიგი ინციდენტი თელავის თეატრთან, სადაც სამოქალაქო აქტივისტები გაყალბებულ არჩევნებს აპროტესტებენ - კარავთან დამაგრებულ ძელს ავტომობილი დაეჯახა.

სამოქალაქო აქტივისტის, რამაზ აივაზაშვილის თქმით, შეჯახების შედეგად არავინ დაშავებულა, თუმცა აქტივისტი ეჭვობს, რომ შემთხვევა შესაძლოა მათ დასაშინებლად, მიზანმიმართულად მოხდა.

აივაზაშვილი პოლიციამ მომხდარ ფაქტზე უკვე გამოკითხა.

ცნობისთვის, აქტივისტები პირველ იანვარს სიკვდილს შემთხვევით გადაურჩნენ.

ახალი წლის პირველ დღეს სწორედ მსგავსი ინციდენტი მოხდა. როგორც აქციის მონაწილეები ამბობდნენ, კარავს ავტომობილი მიზანმიმართულად დაეჯახა.

მომხდარზე გამოძიება ამ დრომდე მიმდინარეობს და დამნაშავის დასჯის მოთხოვნით, საპროტესტო აქციებიც გაიმართა.