ხანძარი ზუგდიდის მუნიციპალიტეტის სამ სოფელში - საგანგებო სიტუაციების მართვის სამსახურის გაფრთხილება საზოგადოებას

საზოგადოება - 16:55, 04 Jan, 2021

1130

ხანძარია ზუგდიდის მუნიციპალიტეტის სამ სოფელში - დავითიანში, ნაზარენსა და ჯუმში ცეცხლი ტყის პირას ეკალ ბარდებსა და თხილის პლანტაციებს უკიდია.

საგანგებო სიტუაციების მართვის სამსახური მოსახლეობას მოუწოდებს, თავი შეიკავონ მინდვრებზე ბალახის დაწვისგან. ხანძრის რამდენიმე კერის ჩაქრობის პროცესს ძლიერი ქარიც ართულებს. დახმარების მიზნით, საჭირო გახდა დამატებითი ტექნიკის მობილიზება გურიიდან, აჭარიდან და იმერეთიდან. გთავაზობთ სპეციალურ განცხადებას, რომელსაც საგანგებო სიტუაციების მართვის სამსახური ავრცელებს:
"საზოგადოებრივი უსაფრთხოების მართვის ცენტრ "112"-ში სამეგრელო-ზემო სვანეთის რეგიონიდან შემოსულია 40-ზე მეტი შეტყობინება მინდვრის ხანძრების შესახებ. ცეცხლი, ძირითადად, უკიდია ბალახს და ეკალბარდს. ყველა შემთხვევაზე მომხდარია რეაგირება. ადგილებზე იმყოფებიან მეხანძრე-მაშველები და მიმდინარეობს სალოკალიზაციო-სალიკვიდაციო სამუშაოები.
ძლიერი ქარის გამო, რამდენიმე კერაზე არსებობს პლანტაციებსა და ნარგავებზე ცეცხლის გადასვლის საფრთხე. პრევენციისა და დახმარების მიზნით გურიიდან, აჭარიდან და იმერეთიდან ხდება დამატებითი ძალების და სახანძრო ტექნიკის მობილიზება.
შინაგან საქმეთა სამინისტროს საგანგებო სიტუაციების მართვის სამსახური მოუწოდებს მოსახლეობას თავი შეიკავონ მინდვრებში და სახნავ მიწებზე ბალახის დაწვისგან. დასავლეთ საქართველოში ძლიერი ქარია და მშრალი ამინდი, რაც ხელს უშლის მეხანძრე-მაშველებს ხანძრების სალიკვიდაციო სამუშაოებში.მინდორში და სახნავ მიწებზე ბალახის დაწვამ შეიძლება გამოიწვიოს ხანძრის გავრცელება როგორც საცხოვრებელ სახლებზე, ასევე, ტყის მასივებზე" - ნათქვამია განცხადებაში.