დაკარგული თაობა და მძიმე სოციალური ფონი შიდა ქართლში - ტექნიკისა და ინტერნეტის გარეშე დარჩენილ მოსწავლეებს სკოლის მიტოვება უწევთ

საზოგადოება - 13:19, 27 Dec, 2020

1272

შიდა ქართლში არსებული მძიმე სოციალური ფონის გამო ოჯახებს არ აქვთ საშუალება, ბავშვები საჭირო ტექნიკით და ინტერნეტით მოამარაგონ, რათა ონლაინ გაკვეთილებს დაესწრონ. ამის გამო, შესაძლოა, მოსწავლეთა უმეტესობამ სკოლა მიატოვოს. აღნიშნული პრობლემის წინაშე განსაკუთრებით ის მოსწავლეები დგანან, რომლებიც საოკუპაციო ხაზთან ცხოვრობენ:

"ტელევიზორი, ტელეფონი, კომპიუტერი - არც ერთი მაქვს, რომ ვისწავლო. შეიძლება მე-9 კლასიდანაც გამოვიდე", - აღნიშნა ერთ-ერთმა მოსწავლემ.

"ინტერნეტის გარეშე სწავლა მიჭირს, ჩამოვრჩი... სამნი ვართ და ვერც ერთი ვერთვებით გაკვეთილებზე" - განაცხადა კიდევ ერთმა მოსწავლემ.

ექსპერტთა შეფასებით, ხელისუფლებას თავის დროზე უნდა ეზრუნა ბავშვებზე, ეს სიტუაცია კი შესაძლოა თაობის ერთი ნაწილის დაკარგვის ფასად დაუჯდეს ქვეყანას:

"პრაქტიკულად, თაობის ერთ ნაწილს ვკარგავთ განათლების კუთხით და გამორიცხული არ არის, რომ ვიღაცებმა უარი თქვან სასწავლო პროცესში ჩართვაზე", - განაცხადა არინა თავაქარაშვილმა.

"ხელისუფლების უდიდესი სირცხვილია, ის არ უზრუნველყოფს, რომ ბავშვებისთვის ხელმისაწვდომი იყოს განათლება", - აღნიშნა სამოქალაქო აქტივისტმა თეონა ფანქველაშვილმა.