აშშ-ში კომპანია Pfizer-ის მიერ წარმოებული კოვიდ 19-ის ვაქცინა უკვე ყველა შტატში მიიტანეს და დღეიდან ოფიციალურად იწყება ვაქცინაციის პროცედურა. გავრცელებული ინფორმაციით, მარტის ბოლომდე 100 მილიონ ადამიანს აცრიან.

ამერიკული მედიის ცნობით, პირველ რიგში მედიკოსები და მოხუცთა თავშესაფარში მყოფი ბენეფიციარები მიიღებენ ვაქცინას.

BBC-ის თქმით, ვაქცინის პირველი დოზები, უკვე ჩაწყობილია მშრალი ყინულის მქონე სპეც კონტეინერებში, რომლებიც მთელი ქვეყნის მასშტაბით სატვირთო ავტომობილებითა და თვითმფრინავებით გადააქვთ. ვაქცინის განაწილების პროცესს ხელმძღვანელობს ამერიკის არმიის გენერალი გუსტავ პერნა, რომლის თქმით, სულ 145 ლოკაციაზე მიიტანენ ორშაბათისთვის ვაქცინას, სამშაბათსა და ოთხშაბათს კი დამატებით 491 ადგილზე განათავსებენ კოვიდ 19-ის პრევენციულ პრეპარატებს. პირველადი მიწოდების შესაბამისად, სულ 3 მილიონი ადამიანის ვაქცინაცია მოხდება.

შეგახსენებთ, რომ Pfizer-ის კორონავირუსის საწრინააღმდეგო ვაქცინამ 95 %-იანი ეფექტურობა გამოავლინა, რომლის შემდეგაც მან აუცილებელი საჭიროების შესაბამისად გამოყენების უფლებამოსილება მიიღო ამერიკის საჭმლისა და წამლის ადმინისტრაციის მიერ.