მთელი ღამის განმავლობაში ოპოზიციის ლიდერების მაქსიმალური რაოდენობა კიევის ცენტრში, „ევრომაიდანზე“ რჩებოდა და კიევის დროით დაახლოებით 04:00 საათისთვის მათ მიაღწიეს შეთანხმებას ძალოვნებთან, რომ შტურმი ადმინისტრაციული შენობებიდან დემონსტრანტების გამოყვანის მიზნით გადაედოთ.

მანამდე კი კიევის ცენტრში სიტუაცია არაპროგნოზირებადი იყო: ქუჩაში გამოსულთა რაოდენობა მატულობდა, სულ უფრო მეტი მოხალისე ეწერებოდა ე.წ. სახალხო რაზმებში, რომელთა მიზანი „ბერკუტის“ აგრესიისგან დემონსტრანტთა დაცვა იყო. კიეველები მოკლე ტექსტური შეტყობინების სახით მობილურებზე ღებულობდნენ მიწვევას, გასულიყვნენ ევრომაიდანზე 3:30 საათზე, რაც ბევრმა შეასრულა კიდეც.

კიევის ცენტრში აღმართული საშობაო ნაძვის ხის ტოტებისგან და მისი სხვა მოწყობილობებისგან მოხალისეებმა ბარიკადები შექმნეს, მოედანზე გაშალეს კარვებიც.

ვიტალი კლიჩკო აცხადებს, რომ ისინი დაშლას არ აპირებენ, სანამ ვიქტორ იანუკოვიჩი არ გადადგება, ხოლო მთავრობას ურჩევს, ისედაც არ გაივლოს გულში საგანგებო მდგომარეობის შემოღება კიევში, როგორც ეს, კლიჩკოს თქმით, დაგეგმილია.

მთელი ღამის განმავლობაში ევრომაიდნის ტრიბუნასთან პოლიტიკოსები და მომღერლები ერთმანეთს ენაცვლებოდნენ. მოედანზე შეკრებილი ხალხისთვის კლიჩკოს მეუღლემაც იმღერა.

ტრიბუნასთან გამოვიდნენ კიევის უმაღლესი სასწავლებლების ხელმძღვანელი პირები, მათ შორის, რამდენიმე რექტორიც, რომლებმაც სტუდენტებს მოუწოდეს, ხვალ ლექციების ნაცვლად „ევრომაიდანზე“ გამოცხადებულიყვნენ.

იმის მიუხედავად, რომ გუშინ, ღამის განმავლობაში კიევის ქუჩებში შედარებით ცოტა სამართალდამცველი იყო გამოსული, შეტაკება მაინც მოხდა: დემონსტრანტებმა კიევის ცენტრში მდგარ ლენინის ძეგლზე, მისი დემონტაჟის მიზნით მიიტანეს იერიში, მაგრამ "ბერკუტმა", რომელმაც ალყა შემოარტყა ლენინის ძეგლს, მათ ამის საშუალება არ მისცა.

ოპოზიციის ლიდერები ვარაუდობენ, რომ დილიდან დემონსტრანტთა რაოდენობა კიდევ უფრო გაიზრდება. უკრაინის შსს-ს მონაცემებით, მხოლოდ გუშინ კიევის ქუჩებში, საერთო ჯამში, მილიონზე მეტი ადამიანი გამოვიდა.