რუსეთის საგარეო საქმეთა მინისტრის პრესსპიკერმა, მარია ზახაროვამ აღნიშნა, რომ ნატოს სამხედრო გემების მიმოსვლა შავი ზღვის ტერიტორიაზე ძირს უთხრის რეგიონის სტაბილურობას, რასაც რუსეთი რეაგირების გარეშე ვერ დატოვებს. ამის შესახებ მაღალჩინოსანმა დიპლომატმა ბრიფინგზე განაცხადა.

მისი თქმით, ალიანსი აფართოებს საქმიანობის არეალს შავ ზღვაში და იზიდავს ისეთ ქვეყნებს, როგორებიცაა უკრაინა და საქართველო. ნატო ამ სახელმწიფოებს ასწავლის რუსეთთან დაპირისპირების მეთოდებს და აქეზებს მათ.

„ნატოს ქვეყნების ხომალდების შავი ზღვის აკვატორიასა და პორტებში მიმოსვლა ხშირია, იზრდება აგრეთვე სადაზვერო თვითმფრინავებისა და უპილოტო საფრენი აპარატების ფრენები რუსეთის საზღვრების გასწვრივ. მიმდინარეობს ბულგარეთისა და რუმინეთის ინფრასტრუქტურის მოდერნიზება, მათ ტერიტორიაზე ხდება შეტევითი შეიარაღების განთავსება. სწავლებების დროს მუშავდება ისეთი სცენარები, რომლებიც ითვალისწინებს და განიხილავს ბირთვული ქობინების მატარებელი ამერიკული სტრატეგიული ბომბდამშენებით საჰაერო ავიაიერიშებს რუსეთის ტერიტორიაზე“ - განაცხადა ზახაროვამ

„ჩვენ იძულებულნი ვართ ალიანსის სამხედრო აქტიურობა გავითვალისწინოთ და შესაბამისად მოვახდინოთ მათზე რეაგირება“- აღნიშნა რუსმა დიპლომატმა.