რა უჯდება სახელმწიფოს ჰოსპიტალში მოთავსებული ერთი კოვიდინფიცირებულის მკურნალობა?

COVID-19 - 13:53, 03 Dec, 2020

2209

კოვიდინფიცირებული პაციენტი, რომელიც მკურნალობას კლინიკაში გადის, სახელმწიფოს საშუალოდ 2 000 ლარი უჯდება.

ჯანდაცვის მინისტრის მოადგილის თამარ გაბუნიას განმარტებით, ეს თანხა არ მოიცავს იმ ხარჯებს, რომელიც სამედიცინო ინვენტარის მომზადებასა და მედპერსონალის ტრენინგისთვისაა გამოყოფილი. გაბუნიას თქმით, რიგ შემთხვევაში უფრო ნაკლები, ზოგჯერ კი მეტი ჯდება, ეს პაციენტის სიმძიმეზეა დამოკიდებული, თუმცა „უხეში გათვლით“, საშუალო ნიშნული ასე გამოიყურება:

„სახელმწიფოს ინფიცირების ერთი შემთხვევის მართვა, რაშიც ჰოსპიტალურ მართვას ვგულისხმობ, დაახლოებით 2 000 ლარი უჯდება, მაგრამ ეს არის ძალიან უხეში გათვლა, რადგან რიგ შემთხვევაში ეს შეიძლება იყოს 1 000 ლარი და მეტი და რიგ შემთხვევაში შეიძლება იყოს 500 ლარი.

საშუალო შეფასებისთვის ვიყენებთ 2 000-ლარიან ნიშნულს. ეს არ ითვალისწინებს იმ ინვესტიციას, რომელიც გაწეულ იქნა და კიდევ უნდა იქნას გაწეული ჟანგბადის უზრუნველყოფისთვის, სუნთქვის აპარატების მობილიზებისთვის, პერსონალის ტრენინგისთვის, ანუ სისტემის მომზადებისთვის საინვესტიციო ხარჯი - ეს ცალკეა“, - განაცხადა თამარ გაბუნიამ.

თავად ჯანდაცვის მინისტრი ეკატერინე ტიკარაძე რამდენიმე კვირის წინ ერთ პაციენტზე სამკურნალო კონკრეტულ თანხას მიახლოებითაც ვერ ასახელებდა და აღნიშნავდა, რომ თითოეული ინფიცირებული ინდივიდუალურ მკურნალობასა და შესაბამისად, ინდივიდუალურ ხარჯებს საჭიროებდა.