რომ მოკვდება მერე დამიკავშირდებიან? - კოვიდინფიცირებული 70 წლის ქალის ოჯახი დახმარებას ითხოვს

COVID-19 - 10:15, 03 Dec, 2020

1043

ქვეყანაში პანდემიის გამო შექმნილი მდგომარეობა დღითი დღე მძიმდება. კლინიკებში ადგილი აღარ არის - მძიმე პაციენტები, რომლებიც რისკ-ჯგუფში არიან, სახლებში მკურნალობენ; სასწრაფოს გამოძახების დროს მოქალაქეები 112-ს მარტივად ვერ უკავშირდებიან, დაკავშირების შემხთხვევაში კი სასწრაფო დახმარების ბრიგადა ვერ მიდის საჭირო ლოკაციაზე, ამის გამო კი პაციენტების მდგომარეობა მძიმდება.

სოფელ აღაიანში მაცხოვრებელი ოჯახი სწორედ ამ ურთულესი მდგომარეობის გამო დახმარებას ითხოვს - 70 წლის ქალი, რომელიც კორონავირუსით არის ინფიცირებული, კლინიკაში უადგილობის გამო ვერ გადაჰყავთ, მისი მდგომარეობა კი დღითი დღე უარესდება. ურგუია ბაირამოვს ინფექციის გარდა ქრონიკული ასთმა აქვს. ოჯახის განცხადებით, სასწრაფო დახმარების ჯგუფი რამდენჯერმე გამოიძახეს, თუმცა მათთან არავინ მისულა:

"დედა მიკვდება სახლში, მესამე დღეა ვცდილობ საავადმყოფოსი მოვათავსო, სასწრაფოში ვრეკავ არ მპასუხობენ. თუ მიპასუხებენ კიდევაც სხვაგან დარეკეთო. - სამინისტროს ნომერი მომცეს, იქიდან მითხრეს დაგიკავშირდებიანო, როდის, რომ მოკვდება მერე დამიკავშირდებიან ?!" - განაცხადა ბაირამოვის შვილმა.

კასპის სასწრაფო სამედიცინო დახმარების ცენტრში კი აცხადებენ, რომ მათთან შეტყობინება არ შესულა გამოძახებაზე, სხვა შემთხვევაში მედიკოსთა ჯგუფი ადგილზე აუცილებლად მივიდოდა.