მიტროპოლიტი ნიკოლოზ ფაჩუაშვილი აცხადებს, რომ Iphone 11 pro ჟურნალისტების თავდასხმებისგან და მათი მხრიდან ფაქტების არასწორი გაშუქებისგან თავდაცვის მიზნით შეიძინა და ამ მიზნით, მიტროპოლიტმა საკუთარი Youtube-ის არხიც კი შექმნა.

"თავდასხმას აქვს ადგილი. ამ თავდასხმამ კულმინაციას მიაღწია - მარტვილში წირვა რომ გაგვაჩერებინა მე იძულებული გავხდი მეფიქრა, რა შეიძლება ამას წინ დაუყენო. ყოველი წირვის მერე მოდიან ჟურნალისტები და ვისაც როგორ უნდა ისე აშუქებს. აჩვენებენ ჩემს ნათქვამს და პირიქით ატრიალებენ.

მე გადავწყვიტე, რომ ტელეფონით გადამეღო და გამომექვეყნებინა ჩემს იუთუბ არხზე", - ამბობს მიტროპოლიტი “რუსთავი 2-ის“ ეთერში.

მეუფე მაყურებლებს თავისი არხის მისამართსაც აცნობს.

"ადვილია ძალიან ჩემს Youtube არხზე მოხვედრა, მეუფე ნიკოლოზი ქართული ასოებით უნდა ჩაიწეროს და მერე ტირე და იქ ფილმებიც არის და ჩემი ქადაგებებიც", - ამბობს მეუფე.

ცნობისთვის, მეუფე ნიკოლოზის მიერ Iphone-ის ბოლოსწინა მოდელის შეძენის შესახებ ინფორმაცია რამდენიმე თვის წინ გავრცელდა. მაშინ მეუფებ ჟურნალისტებს განუცხადა, რომ ძვირადღირებული მობილური ხარისხიანი ფოტოების გადასაღებად სჭირდებოდა.