"კორონავირუსის შედეგად გარდაცვლილი 19 წლის გოგოს საქმეს ჯანდაცვის სამინისტროს კლინიკური აუდიტის ჯგუფი უმოკლეს ვადაში შეისწავლის", - ამის შესახებ ჯანდაცვის მინისტრის მოადგილემ, თამარ გაბუნიამ განაცხადა.

კითხვაზე, თუ რატომ არ მოათავსეს თანმდევი დაავადების გათვალისწინებით 19 წლის ინფიცირებული კოვიდსასტუმროს ნაცვლად ჰოსპიტალში, თამარ გაბუნია პასუხობს, რომ თანმდევი დაავადებების შემთხვევაში, მკურნალობის შესახებ გადაწყვეტილებას ოჯახის ექიმი იღებს, პაციენტის მდგომარეობაზე დაკვირვებით.

"ზოგადად, სამინისტროს პროტოკოლი ითვალისწინებს თანხმლები დაავადებების შემთხვევაში ჰოსპიტალიზაციას, გარდა იმ შემთხვევებისა, თუ ექიმი გადაწყვეტს, რომ პაციენტის მდგომარეობა სტაბილურია და შეიძლება მისი მართვა მოხერხდეს კოვისასტუმროში, იმ დაშვებით, რომ კლინიკური გამოკვლევები მას ჩაუტარდება კოვიდასასტუმროდანაც.

რამდენადაც მე ვიცი, ამ შემთხვევასთან გვაქვს საქმე, როდესაც ექიმის შეფასებით ჩაითვალა, რომ მდგომარეობა იყო სტაბილური და საწყის ეტაპზე, პაციენტს მიეცა რეკომენდაცია კოვიდსასტუმროში მკურნალობის და მაშინვე მოხდა მისი გაყვანა კვლევებისთვის, დამატებით სიმძიმის შეფასების მიზნით", - ამბობს გაბუნია.

შეგახსენებთ, რომ კორონავირუსით 19 წლის გოგო 29 ნოემბერს გარდაიცვალა, მას თანმდევი დაავადება - დიაბეტი სჭირდა, რამაც, გერმანული ჰოსპიტალის ექიმების თქმით, ლეტალური შედეგი გამოიწვია. პაციენტი რამდენიმე დღის განმავლობაში კოვიდსასტუმროში მკურნალობდა, ჯანმრთელობის დამძიმების შემდეგ კი იგი გერმანულ ჰოსპიტალში გადაიყვანეს, სადაც 3 დღიანი მცდელობის მიუხედავად, ექიმებმა მისი გადარჩენა ვერ შეძლეს.