"პოლიტიკური პროცესიც უნდა ემორჩილებოდეს პანდემიის მართვას, შეზღუდვების დაწესება ერთია, მისი აღსრულება - მეორე"

"პოლიტიკური პროცესიც უნდა ემორჩილებოდეს პანდემიის მართვას, შეზღუდვების დაწესება ერთია, მისი აღსრულება - მეორე" - ამირან გამყრელიძე

COVID-19 - 13:15, 30 Nov, 2020

790

დაავადებათა კონტროლის ეროვნული ცენტრის დირექტორი ამირან გამყრელიძე ბათუმში მიმდინარე მოვლენებს აფასებს და აცხადებს, რომ პანდემიის მართვას პოლიტიკური პროცესებიც უნდა ემორჩლებოდეს. მისი თქმით, დაწესებულს შეზღუდვებს ყველა უნდა დაემორჩილოს, რათა ვირუსის გავრცელება შეფერხდეს:

"დღეს ჩვენ, სულ ყველა, პოლიტიკური პროცესიც, უნდა ემორჩილებოდეს პანდემიის მართვას. სერიოზული პანდემიის წინაშეა მსოფლიო, სერიოზული ზრდა გვაქვს ქვეყანაში ინფიცირების, ამის შეჩერების რამდენიმე მიდგომა არსებობს. ერთ-ერთი არის შემზღუდველი ღონისძიებები, რაც ქვეყანამ დააწესა, მაგრამ დაწესება ერთია და მისი აღსრულება - მეორე.

თუ მას არ აღვასრულებთ და ჩვენ თვითონ არ გავითავისებთ, თითოეული ადამიანი, რომ ჩვენ უნდა დავიცვათ ის რეკომენდაციები, რასაც გვეუბებიან, ისე არაფერი გამოვა", - განაცხადა გამყრელიძემ.

შეგახსენებთ, რომ ბათუმში აჭარის მთავრობის სახლთან აქციები პერმანენტულად იმართება, სადაც საზოგადოება ხელახალი არჩევნების გარდა შეზღუდვების დაწესების გამო შემოსავლის გარეშე დარჩენასაც აპროტესტებს.

პარალელურად, ბათუმში წუხელ ფიტნეს-დარბაზ Reformerfitness-ში სამართალდამცველები შევიდნენ, რასაც საზოგადოების მხირდან კიდევ ერთი აქციის გამართვა მოჰყვა.

დღეს კი სხვადასხვა ქალაქებში გარემოვაჭრეები მართავენ აქციებს, რომლებიც დაწესებულ შეზღუდვებსა და შემოსავლის გარეშე დარჩენას აპროტესებენ.