ვითომ ხალხზე ფიქრობენ, არანაირ დახმარებას არ გვიწევენ - შემოსავლის გარეშე დარჩენილმა გარემოვაჭრეებმა რუსთავში გზა გადაკეტეს

საზოგადოება - 12:28, 30 Nov, 2020

799

ე.წ. სტამბოლის ბაზრის გარე მოვაჭრეებმა, რომლებიც დაწესებული შეზღუდვების გამო შემოსავლის გარეშე დარჩნენ, რუსთავში ცენტრალური გზა გადაკეტეს.

აქციის მონაწილეების განცხადებით, ვითარებაში გასარკვევად ადგილზე ქალაქის მერი ირაკლი ტაბაღუაც მივიდა, თუმცა მან მოქალაქეების კითხვებს არ უპასუხა.

"გუშინ მოვიდნენ, ვითომ გაფრთხილებაო. გაფრთხილება კი არა, ტრაქტორს მოვიყვანთო, ფეხებზე გვკიდიხართო თქვენო, ვითომ მოსახლეობაზე ფიქრობენ და ხალხისთვის, არანაირ დახმარებას არ გვიწევენ. ადგილებზე დაჯდნენ, სკამებზე და აღარ უნდათ აღარაფერი. არჩევნების წინ სად იყვნენ? ხალხი მაშინ არ იხოცებოდა? თუ ხალხზე ფიქრობდნენ, მაშინ უნდა დაეკეტათ", - აცხადებს აქციის ერთ-ერთი მონაწილე.

გარემოვაჭრეების თქმით, მათ დახმარება გაზაფხულზეც ვერ მიიღეს.

"პენსიონერი ვარ, 78 წლის ქალი. ვმუშაობ, 150 ლარს ქირაში ვიხდი, 100 ლარით ნემსებს ვიკეთებ და არც მყოფნის საჭმელად. ჩემთვის ვზივარ ამ პატარა ინდმეწარმეებში და კაპიკებს ვაკეთებ. არც გაგვაფრთხილეს, ისე დაგვიკეტეს", - განაცხადა ერთ-ერთმა გარემოვაჭრემ.

აქციის მონაწილეების განცხადებით, თუ ხელისუფლება ან ვაჭრობის უფლებას არ მისცემს მათ, ა ფულად დახმარებას არ დაუნიშნავს, ისინი პერმანენტულ აქციებს გამართავენ.

შეგახსენებთ, რომ მთავრობის გადაწყვეტილებით, 28 ნომებრიდან 31 იანვრის ჩათვლით ქვეყანაში ახალი შეზღუდვები ამოქმედდა, რომლის ფარგლებშიც სურსათის გარდა ყველა სახის ვაჭრობა აიკრძალა.