ახალციხეში, სოფელ წყალთბილაში კოვიდინფიცირებული მამა-შვილი გარდაიცვალა. ოჯახის წევრების და ექიმის თქმით, კლინიკაში მისულ კაცს მიღებაზე უარი უთხრეს.

"ჩვენმა ექიმმა თქვა, დაუძახეთ სასწრაფოსო. სასწრაფომ თქვა, აუცილებელია საავადმყოფოში წასვლა. მომაკვდავი გოგო სახლში იყო, თვითონ [მამა] წავიდა მეორე გოგოსთან ერთად საავადმყოფოში, იქ უთხრეს, რომ დღეს გიორგობაა, ექიმები არ არიან, უკან ტაქსით ჩამოვიდა ტირილით, გუშინწინ გოგო მოკვდა, გუშინ დილით თვითონ მოკვდა" - ამბობს გარდაცვლილების ნათესავი, ლიდა პოღოსოაინი რუსთავი ორთან საუბარში.

ექიმის, ვაჰან ვაჰანიანის თქმით, კოვიდინფიცირებული მამა-შვილი თავად გასინჯა, სასწრაფო დახმარება გამოიძახა და ახალციხის კლინიკაში გაგზავნა.

"სასწრაფო დახმარების ბრიგადა სახლში არ შევიდა, ოჯახის წევრებს უთხრეს, რომ პაციენტი კლინიკაში თავად უნდა მისულიყო. მოხუცი ახალციხის რეფერალურ ჰოსპიტალში თანასოფლელებმა წაიყვანეს, იქ ექთნებს უთქვამთ, რომ ადგილები არ ჰქონდათ, ამის შემდეგ უკან გამობრუნდა და მეორე დღეს, დილის 6 საათზე გარდაიცვალა," - ამბობს კურიერთან ექიმი ვაჰან ვაჰანიანი.