რესტორანთა ასოციაციის ხელმძღვანელი შოთა ბურჯანაძე ხელისუფლების წარმომადგენლებთან შეხვედრის შემდეგ აცხადებს, რომ ერთ-ერთი შესაძლო შეზღუდვა, რომელზეც ხელისუფლება მსჯელობს - ობიექტების სამუშაო საათებისა და დღეების შეზღუდვაა.

მისი თქმით, დამატებითი შეზღუდვების დაწესება იგივე "ლოქდაუნია".

ბურჯანაძის თქმით, შეხვედრაზე, რომელსაც ეკონომიკური მიმართულების მინისტრები ესწრებოდნენ, აზრთა გაცვლა მოხდა, და მორიგი შეხვედრა რამდენიმე დღეში გაიმართება.

"შეხვედრაზე აზრთა გაცვლა უნდა ყოფილიყო და ის მოლოდინი რაც არსებობს კოვიდის განვითარებასთან, მის გაუარებასთან დაკავშირებით, რამდენად შესაძლებელია დამატებითი შეზღუდვების შემოღება, რაც სფეროს დიდად არ დააზარალებდა. წინადადებები იყო შემდეგი: მიწოდების სერვისზე [დილივერზე] გადასვლა სრულიად სფეროსი, საუბარია დიდ ქალაქებზე, იქ სადაც 22:00 საათის შემდეგ კომენდანტის საათია დაწესებული; მეორე - სამუშაო საათების შემცირება. მაგალითად დღეს თუ 21:00 საათზე იკეტება ობიექტი, 20:00-ზე დაიკეტოს, და მესამე - შაბათ-კვირის აკრძალვა რესტორნების მუშაობის. ეს იყო სამსჯელო თემა.

მაგრამ ჩემი მხრიდან გაჟღერდა, რომ რეალურად დღეს რესტორნებისთვის ისედაც იმდენად დიდია შეზღუდვები და რთულია ოპერირება, რომ დამატებით შეზღუდვებს სფერო ვეღარ გაუძლებს და ეს არ არის შეზღუდვა, ეს ჩაითვლება ლოქდაუნად. მეტი დამატებითი შეზღუდვების შექმნა არის ლოქდაუნი, მეტი არაფერი. ამ შემთხვევაში პრობლემა ექმნება არა მარტო რესტორნის მეპატრონეს, არამედ დასაქმებულებსაც, რომლებიც ყოველდღიურ რეჟიმში იღებენ ხელფასს და მათი შემოსავალი ნულს გაუტოლდება. ისინი ელოდებიან ჩვენს შემხვედრ წინადადებას", - განუცხადა "ფორმულას" ბურჯანაძემ.