ნოემბრის ბოლო იქნება ძალიან საყურადღებო , თუმცა პრევენციული ღონისძიებებით შევძლებთ, თუნდაც დღეში 4000-იანი ინფიცირება შევინარჩუნოთ

ნოემბრის ბოლო იქნება ძალიან საყურადღებო , თუმცა პრევენციული ღონისძიებებით შევძლებთ, თუნდაც დღეში 4000-იანი ინფიცირება შევინარჩუნოთ - გაბუნია

COVID-19 - 17:57, 23 Nov, 2020

1221

ჯანდაცვის მინისტრის მოადგილე, თამარ გაბუნიას განცხადებით, ნოემბრის ბოლო ძალიან საყურადღებო იქნება. მისი თქმით, შეზღუდვების დაწესების შემდეგ შესაძლებელი იქნება, კორონავირუსის გავრცელება შემცირდეს და "თუნდაც 4000-იან ნიშნულზე შეჩერდეს".

თამარ გაბუნიამ ხაზგასმით განაცხადა, რომ კრიტიკულად აუცილებელია პირბადის გამოყენება.

"ყველაზე საყურადღებო არის ის, რომ ჯერ კიდევ ვერ ვამბობთ, ეს არის პიკი თუ შემდეგი მატება კიდევ წინ გვაქვს თუ არა. ეს იქნება დამოკიდებული იმაზე, როგორ დავიცავთ იმ წესებს, რაც უნდა დავიცვათ. მათ შორის პირბადის გამოყენება. ამდენად, ჩვენ ვფიქრობთ, რომ ნოემბრის ბოლო იქნება ძალიან საყურადღებო, თუმცა, პრევენციული ღონისძიებებით შესაძლებელია გარკვეული სტაბილიზაცია, რომ ჩვენ თუნდაც 4000-იან ნიშნულზე შევნარჩუნდეთ გარკვეული პერიოდი. სულ მცირე 2-3 კვირა მაინც იქნება საჭირო, ვიდრე სტაბილიზაციის შემდეგ რაღაც კლებას მივიღებთ. ეს აუცილებლად იქნება იმ შემთხვევაში, თუ დავიცავთ წესებს, მათ შორის, პირბადე არის კრიტიკული ფაქტორი. მთელი ევროპა პირველ ადგილზე აყენებს პირბადის გამოყენება”,- განაცხადა ჯანდაცვის მინისტრის მოადგილემ.

ცნობისთვის, კორონავირუსის გავრცელების შემცირების მოტივით ხელისუფლება შეზღუდვების დაწესებას გეგმავს. თუმცა, ჯერჯერობით ხელისუფლების წარმომადგენლებს კონკრეტული განცხადება არ გაუკეთებიათ. მთავრობის მიერ გავრცელებულ განცხადებაში ნათქვამია, რომ სრული ჩაკეტვა, ე.წ ლოქდაუნი არ იგეგმება, თუმცა, მოსალოდნელია "წერტილოვანი შეზღუდვები".