"ვისაც უფრო სჭირდება იმის ადგილს არ დავიკავებ, სხვას უფრო გამოადგებაო" - ვინ არიან covid-19 -ით გარდაცვლილი მედიკოსები

საზოგადოება - 14:17, 20 Nov, 2020

1769

კორონავირუსის საგანგაშო სტატისტიკა - კოვიდინფექციით გარდაცვალების რეკორდული მაჩვენებლების პარალელურად, იზრდება კოვიდ 19-ით გარდაცვლილთა რაოდენობაც.
მაგალითად, ბოლო 24 საათში covid-19 -ით გარდაცვლილ 41 პაციენტს შორის ორი ექიმია.
კორონავირუსის ერთ-ერთი მსხვერპლი ქობულეთის სამედიცინო ცენტრის ექიმი 70 წლის ლალი ბალავაძეა.
არსებული ინფორმაციით, გარდაცვლილი მედიკოსი სრულიად ჯანმრთელი იყო და ასაკის გარდა არანაირი რისკი არ ჰქონდა.
ოჯახის ინფორმაციით სწორედ ამიტომ თქვა კლინიკაში გადაყვანაზე უარი მედიკოსმა: "ვისაც უფრო სჭირდება , იმის ადგილს არ დავიჭერ, სხვას უფრო გამოადგება თავისუფალი საწოლი, სახლში ვიმკურნალებო".
ბალავაძე ინფიცირებიდან მეხუთე დღეს უეცრად დამძიმდა. მაშინვე გადაიყვანეს კლინიკაში და სასუნთქა აპარატზე შეაერთეს, თუმცა, სამწუხაროდ, მისი გადარჩენა ვერ მოხერხდა

კორონავირუსის მეორე მსხვერპლი კი საჩხერის სამედიცინო ცენტრის ექიმი 65 წლის დარეჯან დევიძეა. ის საჩხერის საავადმყოფოში მკურნალობდა და 25 დღე მართვით სუნთქვაზე იმყოფებოდა.

როგორც ირკვევა, მას ფარისებრი ჯირკვლის პრობლემა, ჰიპოფიზის ადენომა და დიაბეტი ჰქონდა. ახლობლების თქმით, დარეჯანს მეუღლე შარშან გარდაეცვალა და მისი 20 წლის შვილი სრულიად ობოლი დარჩა.

ცნობისთვის, ორივე მათგანის ინფიცირების წყარო პაციენტი იყო.

შენიშვნა: ინფორმაცია და ფოტო თავდაპირველად "ამბები.ჯი"-მ გაავრცელა.